NAVENDA NÛÇEYAN - Li Girtîgeha Erzînganê 3 girtiyên siyasî yên li dijî zextan çalakiya greva birçîbûnê li dar dixistin, hatin sirgunkirin. Hat zanîn ku di dema sirgunkirinê de li girtiyan hatiye xistin.
Zext û binpêkirinên mafan ên li Girtîgeha Erzînganê yên li ser girtiyan her ku diçe girantir dibin. Di demên dawî de girtiyên ku cezayê wan xelas bûye nayên berdan, lêgerîna tazî, lêgerîna nava dev û hêj gelek binpêkirinên din li vê girtîgehê di meriyetê de ne. Li gorî nûçeya Ajansa Welat (AW); 3 girtiyên li dijî van zextan dest bi çalakiya greva birçîbûnê kiribûn, di 23’yê Mijdarê de li girtîgehên cuda hatin sirgunkirin û di dema sirgunkirinê de li wan hatiye xistin.
Yek ji girtiyên hatiye sirgunkirin Naîm Turkoz, têkildarî mijarê li ser telefonê agahî da malbata xwe û jê re got ku hatiye sirgunkirin. Li gorî agahiyên malbatê dane, Turkoz di axaftina xwe de wiha got: “Saet di 6.30’an de gardiyan ketin menzelê. Bi lêdanê ez ji mezelê derxistim. Gotin em ê we sirgun dikin. Em bi cilên şevê ewqas rê çûn. Dema gihîştim girtîgeha Ewlehiya Bilind a Kirşehîrê leşkeran got ‘Em ê li hundirê devê we binêrin’ û xwestin me tazî bikin. Lê min qebûl nekir. Li dijî vê yekê leşkeran tundiya fîzîkî li min kirin.”
BI DARÊ ZORÊ HEWL DAN BI ALÊ RE WÊNEYÊ WÎ BIKIŞÎNIN
Di berdewama axaftina xwe de Turkoz anî ziman ku leşkeran xwestine bi darê zorê wêneyê wî li ber alê bikişînin û wiha dirêjî da axaftina xwe: “Min dîsa qebûl nekir. Ji ber min ev sepan qebûl nekir, tundiya fîzîkî li ser min zêde kirin. Dema kontrola tendurustiyê hat kirin, bijîjkê girtîgehê jî rapora xwe girt. Lê bijîşkan di raporê de cih neda tundiya li ser min hatiye kirin. Menzela ku ez niha tê de me li korîdora girtiyên edlî ye. Ev kesên li gel min tên ragirtin, kujerên jinan û kesên bi sûcên destdirêjiya hatine girtin e. Pirsgirêkên van girtiyan ên derûnî hene.”