Li navçeya Qoserê ya Mêrdînê li nokteya kontrolê ya polîsan şeva 5’ê tebaxê polîsan texsiya Serokê Sîteya Galerîvanên Qoserê Tarik Bîrleşîk rawestandibû û gulebaran kiribûn. Dîmenên gulebarankirina wesayîtê û lêdana welatiyan derketin holê. Sê kes jê zarok 6 kes di wesayîtê de bûn. Ewilî polîs wê radewestînin û lêgerînê pêk tînin û piştî ku wesayît hereket dike polîsên tîmên taybet gulebaran dikin. Pişt re dîsa polîs diçin ber wesayîtê û vê carê li welatiyan didin. 8 gule li wesayîtê ketibûn û lê bêyî tiştek ji welatiyan bibe ji êrişê rizgar dibin.

 

Tarik Bîrleşîk û birayê xwe Ramazan Bîrleşîk bi îdiaya “li dijî polîsan derketine” tên binçavkirin û derbarê wan de lêpirsîn hatibû destpêkirin. 

 

Lêpirsîna derbarê bûyerê de didome û dîmenên gulebarankirinê ku ji aliyê kameraya ewlehiya nokteya polîsan ve hatine tomarkirin derketin holê. Ajansa me xwe gihand van dîmenan. Polîs heqaret û lêdanek giran li welatiyan didin. 

 

MA / Ahmet Kanbal