HATAY - Berevajî hejmarên fermî, çavkaniyên pêbawer dibêjin hejmara eskerên li Îdlîbê mirine 160 in. Her wiha seranserê sînorê Yayladagî û Kilîsê jî tevdîr hatine girtin û welatî diltirsî bûne ku êrîş çê bibin.
Di 27'ê Sibatê de li navçeya Seraqîb a Îdlîbê rejîma Sûriyeyê bi tevkariya Rûsyayê ji hewayê ve êrîşî Hêzên Çekdar ên Tirk (TSK) û komên ku Tirkiye piştgiriyê dide wan kir. Li gor hejmarên fermî di êrîşê de 33 esker mirine û ji 30'yî zêdetir esker birîndar bûne.
NEXWEŞXANE TIJE BÛNE
Eskerên birîndar li Nexweşxaneya Dewletê ya Reyhanli, Nexweşxaneya Dewletê ya Hatayê, Nexweşxaneya Dewletê ya Nû ya Hatayê, li Nexweşxaneya Dewletê ya Kirikhanê û li Nexweşxaneya Perwerdehî û Lêkolînê ya Gulhaneyê tên tedawîkirin. Her wiha cenazeyên li morgên van nexweşxaneyan bi dizîka dişînin bajarên wan û ji ber vê nahêlin dîmen bên girtin. Berevajî daxuyaniyên Walîtiya Hatayê, li Nexweşxaneya Dewletê ya Hatayê gelek eskerên birîndar ên jiyana wan di xetereyê de hene û li Nexweşxaneya Dewletê ya Hatayê û Nexweşxaneya Dewletê ya Nû ya Hatayê jî eskerên rewşa wan giran û jiyana wan di xetereyê de hene. Bi tu awayî nahêlin sivîl biçin cihê ku eskerên birîndar lê ne û komên tenduristiyê ji bajarên derdorê hatine nexweşxaneyan.
Piştî êrîşê li navenda Hatayê û seranserê sînorê Sûriyeyê tevdîr hatine girtin û li ser sînor balafirên şerî yên F16 difirin. Her wiha ligel esekerên li ser sînor, polîsên normal û polîsên tevgera taybet jî li ser sînor hatine bicihkirin. Bi taybetî seranserê sînorê Yayladagî û Kilîsê tevdîr hatine girtin û li Reyhanli, Kirikhan, Hassa û Kûmlûyê jî li têketin û derketinên wan tevdîr hatine girtin. Ji xeynî vê bênavber esker û muhîmat ber bi Îdlîbê ve tên şandin.
'DU TABÛR JI HOLÊ RAKIRIN'
Rojnamevanên dixwazin van geşedanan bişopînin, ji hêla polîs û eskeran ve tên astengkirin û her wiha ji xeynî daxuyaniyên walîtiyê û rayedarmn dewletê tu tişt nayê parvekirin. Her wiha ji penaberên li Hatay û navçeyên wê re peyam tên şandin û ji wan re dibêjin ji malên xwe dernekevin.
Li gorî agahiyên ji çavkaniyên pêbawer hatine wergirtin; "Di êrîşa 27'ê Sibatê de êrîşî tabûra ji Kayseriyê hatiye û tabûreke din hatiye kirin. Di êrîşê de heta niha 160 esker mirine; nêzî 300 esker jî birîndar bûne. Ji xeynî eskeran bi gelek HTŞ'yî jî mirine. Em hejmara wan nizanin. Lê li du tabûran dan. Her du tabûrên me jî ji holê rakirin. Di 28'ê Sibatê de gelek cenaze û eskerên birîndar anîn Reyhanliyê. Dewlet hejmara cenazeyan rast nabêje. Niha em û Rûsyayê pev r eşer dikin. Îro esker, polîs û polîsên tevgera taybet, amûrên eskerî, qomando ber bi sînor ve şandin. Dibe ku Sûriye ji nişkave êrîş bike."
Xebatkarekî tenduristiyê jî ku nexwest navê wî bê aşkerekirin, diyar kir ku piştî êrîşê 350 ambulans çûne Deriyê Sînor ê Cîlvegoziyê û ji ber hejmara cenaze û birîndaran zêde ye ji bajarên derdorê jî ambulans hatine xwestin. Xebatkarê tenduristiyê, got: "Me bi xwe cenazeyên hatin hejmartin. Berevajî hejmarên fermî, hejmaar cenazeyan zêdetir e."
Her wiha welatiyên li bajêr jî diltirsî bûne ku êrîş çê bibin.