DERSIM – Nûnerên partiyên siyasî û komeleyan ên li Dersimê bertek nîşanî serlêdana Partiya Vatanê ya ji bo rakirina peykerê Seyîd Riza dan û gotin: “Seyîd Riza bîra gelê Dersimê ye. Tişta tê armanckirin ku civakê bêbîr bihêlin.”
Partiya Vatanê serî li Walîtiya Dersimê û Şaredariya Dersimê da û xwestiye ku Peykerê Seyîd Riza yê li Meydana Seyîd Riza were rakirin û li ser navê Seyîd Riza tiştek di nava sînorê Dersimê de neyê nivîsandin. Vê serlêdana Partiya Vatanê bû sedema hêrsê. Nûnerên partiyên siyasî û komeleyên li Dersimê bertek nîşanî pêkanîna Partiya Vatanê da û gotin ew ê li dijî êrişên ser nirxên xwe derkevin.
CHP: SEYÎD RIZA NIRXÊ CIVAKÊ YE
Parlamenterê CHP’ê yê Dersimê Polat Şaroglu da zanîn ku serlêdana Partiya Vatanê aramiya li Dersimê aloz dike û got: “Seyîd Riza nirxê civakê ye. Ji bo civakê xwedî wateyek mezin e. Serlêdanek wiha aramiya civaka Dersimê xera dike. Em ê li dijî vê serlêdanê derkevin.”
EMEP: PARASTINA SEYÎD RIZA DIJDERKETINA KOMKUJIYÊ YE
Serokê Rêxistina Partiya Kedê (EMEP) ya Dersimê Ergîn Tekîn jî diyar kir ku Partiya Vatanê bermahiya feraseta netewî û yekperest e û got: “Partiya Vatanê bi serlêdana xwe nêzîkatiya xwe ya li hember pirsgirêka kurd daniye holê. Seyîd Riza ji bo gelê Dersimê remzeyek e. Seyîd Riza kesayetek li dijî komkujiya Dersimê xwe parastiye ye. Seyîd Riza nasname û bîra xelkê Dersimê. Xwedî derketina Seyîd Riza di heman demê de dij derketina komkujiya Dersimê ye. Wê li dijî van serlêdan û pêkanînan li her deverê bi xelkê me re sekna me xwe bide nîşdandan.”
HDP: BERMAHIYA KESÊN KOMKUJIYA DERSIMÊ PÊK ANÎNE YE
Parlamenterê HDP’ê yê Dersimê Alîcan Onlu jî diyar kir ku Partiya Vatanê berdewama zîhniyeta Îttîhat Terakkî û bermahiya plangerê komkujiya Dersimê ye û wiha got: “Serlêdana wan êrîşa li dijî însaniyet û gelê kurd-elewî ye. Çawa ku di komkujiya Dersimê de tehamulî bedena Seyîd Riza nekirin, niha jî bi heman awayî ev zîhniyet tehamulî peykerê wî nake. Bi taybetî di serdemek wiha de ku vê daxwazê anîne ziman armancek wê taybet heye. Ev tenê serlêdanek rakirina peyker e. Partiya Vatanê dixwaze bi vê serlêdanê ser rastiya komkujiya Dersimê biniximîne. Ev zîhniyet vê yekê tenê ne li Dersimê pêk tîne. Li her devera Kurdistanê êrişên topyekûn pêk tîne. Ji ber vê yekê divê em jî topyekûn li dijî vê yekê derkevin.”
PSAKD: WÊ KES GUH NEDE SERLÊDANA WAN
Serokê Şaxa Komeleya Çandê ya Pîr Sûltan Abdal (PSAKD) a Dersimê Alî Ekber Kaya jî destnîşan kir ku Seyîd Riza nirxê gel e û wiha got: “Mafê tu kesî nîne ku ji bo vê mijarê gotin jî bêje. Wê tu bersiva vê serlêdanê tune be. Gelê Dersimê ji berê ve xwedî li nirxên xwe derketiye. Wê gel ji niha şûn ve jî xwedî derkeve. Ev hewldanek êrişa li dijî neqebûlkirina nirxên gel e. Na mafê wê partiyê ye ku daxwaz û gotinên provokatîf ji nirxên me re bêje. Wê kes guh nedê.”
DEDEF: RÊBERÊ GEL E
Serokê Giştî yê Federasyona Komeleyên Dersimê (DEDEF) Alî Haydar Ben jî da zanîn ku Partiay Vatanê zîhniyeta xwe ya nijadperestiyê didomîne û got: “Dixwazin bila qebûl bikin û dixwazin bila nekin jî, Seyîd Riza rêberek gel e. Berxwedêrê dij derketina komkujiyê ye. Ji bo me remz e û hafiza ye. Dixwazin hafizaya Dersimê ji holê rakin.”
DAD: ARMANC EW E KU GEL BÊBÎR BIHÊLIN
Hevseroka Komeleya Elewiyên Demokratîk (DAD) Selda Guneş jî polîtîkaya tevdanê ya Partiya Vatanê ku li ser nirxên gel pêk tîne şermezar kir û got: “Partiya Vatanê yek ji gefên herî mezin a li dijî aştiya welat e. Ne partiyek siyasî ye, rêxistinek ku dixwaze civakê ji hev parçe bike ye. Ewilî xwestin navê Şêx Seîd li Amedê were rakirin niha jî dixwazin peykerê Seyîd Riza were rûxandin. Şêx Seîd û Seyîd Riza hafiza û nirxên hevpar ên gel in. Dixwazin bi vê tiştê civakê bêbîr bihêlin. Bila kes di bin navê ‘vatan’ de xayîntiyê neke.”
MA / Semra Tûran