Amedekariyên Hêzên Sûriyeya Demokratîk (QSD) ên ji bo darizandina çeteyên DAIŞ'ê yên ku di "Operasyona Bagera Cizîrê" de girtibûn berdewam dikin. Di çarçoveya xebatên ji bo sazkirina dadgeha navneteweyî, li Bakur û Rojhilatê Sûriyeyê komîteyeke hiqûqî ku ji 6 kesan pêk tê, hat avakirin. Komîteyê derbarê dadgehê de bi gelek aliyên civakê re hevdîtinan kir û ji bo sazkirina dadgehê nameyek ji hêzên navneteweyî re şand. Komîteyê daxwazên xwe di nameyê de bi 8 xalan rêz kir.

 

DADGEHÊN PARASTINA GEL

 

Li Bakur û Rojhilatê Sûriyeyê tenê di hêla leşkerî, siyasî, aborî û dîplomatîk de xebat nayên kirin, di heman demê de li hêla darazê de jî xebatên girîng tên kirin. Li gel dagehên bûyerên civakî, dadgehên taybet ên ku endamên EL Nûsra û DAÎŞ'ê lê tên darizandin jî hene. Di van dadgehên ku weke Dadgehên Parastina Gel tên pênasekirin de heta niha 7 hezar endamên DAÎŞ'ê hatine darizandin. Li van dadgehan tenê endamên DAÎŞ'ê yên sûriyeyî tên darizandin û di nav heyetên dadgehê de hiqûqnasên ku di nav komîteya ku daxwaza dadgeha navneteweyî dikin de cih digirin jî hene. 

 

Darizandina endamên DAIŞ'ê ya li van dadgehan didome û cezayên herî hindik bigire heta cezayên muebetê jî tê birîn. Di nav endamên DAIŞ'ê yên ku ceza li wan tê birîn de kesên ku komkujiya pêk anîne, serê mirovan jêkirine, zarokan kuştine û jinên êzidî di bazarên koleyan de firotine jî hene.  

 

ADALETA JINÊ

 

Yek ji taybetmendiya herî balkêş a Dadgehên Parastin Gel, heyetên dadgehan piranî ji jinan pêk tê. Ji 3 dadgerên ku di heyetan de cih digirin 2 jê jin in. Jinên ku di serî de ji hêla leşkerî ve di qada siyasî de li dijî DAIŞ'ê rola sereke leyîstin, niha jî ji hêla darazê ve berpirsyariyên mezin digirin ser xwe. 

 

JI BO DADGEHA NAVNETEWEYÎ 8 XAL

 

Xalên nameya ku ji bo sazkirina dadgeha navneteweyî ji welatên endamên Koalîsyona Navnetweyî ya Dijberî DAIŞ'ê re hat şandin wiha ne;

 

1- Endamên DAÎŞ'ê yên hatine girtin, ji bo ku li dadgeheke taybet ku bi pêşengiya Konseya Ewlehiyê ya Neteweyên Yekbûyî li Bakûr û Rojhilatê Sûriyeyê bê avakirin, bên darizandin, divê fişar li raya giştî ya navneteweyî bê kirin. 

 

2- Ji bo Dadgehên Parastina Gel divê piştgiriya lojîstîk bê dayîn û kesên di qada hiqûqê de pisporên bê peywirdarkirin.

 

3- Divê hêzên navneteweyî ji bo darizandina endamên DAÎŞ'ê, vekolandina şertên girtîgehan û rêveberiya girtîgehan û dadgerên dadgehên parastina gel di hêla rê û rêbazê de piştgirî bidin.

 

4- Divê ji bo çêkirina cihên taybe ên ji bo lêgirtina kesên hukum xwarine, parastina ji nexweşiyan û vekirin cihên mina nexweşxaneyan ên tedawiyê û ewlehiyê piştgiriya lojîstîk bê dayîn. 

 

5-Ji bo endamên DAÎŞ'ê û malbatên wan xesar nedin civakê, divê navendên rehebîlîtasyonê yên taybet bên vekirin. 

 

6- Divê ji bo zarokan ku herî zêde ji aliyê endamên DAÎŞ'ê ve hatin îstîsmarkirin, navendên rehabîlîtasyonê yên taybet bên vekirin.

 

7- Divê ji bo deşîfrekirina hucreyên veşarî yên DAÎŞ'ê piştgiriya agahî parvekirin û lojîstîkê bê dayîn. 

 

8- Ji pêkanîna xalên li jor hatine rêzkirin, komîteyeke hevpar ku ji hiqûqnas û pisporên ewlehiyê pêk bê ji alliyê rêveberiya xweser û Koalîsyona Navnetweyî ya Dijberî DAIŞ'ê ve bê avakirin.

 

MA / Nazım Daştan