MÊRDÎN - Girtî Halef Yiğit (25) ku 141 roj in di greva birçîbûnê de ye û piştî ku duh hat berdan çalakiya xwe li mala xwe ya Qoserê didomîne ev tişt got: "Çi dibe bila bibe heta tecrîd bi dawî nebe dê çalakiya me bidome. Ji ber ku em zanin jiyan berxwedan e."
Girtî Halef Yiğit (25) ku ji 5'ê Çileyê ve li Girtîgeha Tarsûsê, ji bo rakirina tecrîda li ser Rêberê PKK'ê Abdullah Ocalan, di greva birçîbûnê de bû, duh piştî ku hat berdan çalakiya xwe li mala xwe ya navçeya Qoserê ya Mêrdînê didomîne. Ji ber çalakiya wî di asta herî krîtîk de ye, bijîjkan ew hişyar kir ku rêwitiyê neke û jê xwestin ku li nexweşxaneyê bê razandin. Yîgît vê xwesteka bijîjkan red kir, amabûlansekê hat mala xwe ya Qoserê û li odeya ku malbata wî jê re amade kiribû hat bicihkirin.
'EM JI BO XWE TIŞTEKÎ NAXWAZIN'
Yîgît têkidlarî girîngî û wateya çalakiya greva birçîbûnê ji Ajansa Mezopotamyayê (MA) re axivî. Yîgît diyar kir ku ew ji bo xwe tiştekî naxwazin û wiha got: "Armanca me şikandin û bidawîkirina tecrîdê ye. Dema me bihîst em ê bikevin grevê, em gelekî kêfxweş bûn. Di encamê de çalakiyeke ku em pê şanaz dibûn bû. Hemû hevalên me ji bo ku di koma destpêkê de cih bigirin derketin pêş. Min jî di 5'ê Çileyê de bi dildarî li Girtîgeha Tarsûsê dest pê kir. Yigît got ku moralê hemû hevalên wî yên çalakger di cih de bûye lê rewşa wan her roj girantire dibe.
'KENÊ HEVALEKÎ JÎ MORAL DIDE ME'
Yîgît destnîşan kir ku ji ber rewşa hevalên xwe ne kêfxweşe ku hatiye berdan û ev tişt anî ziman: "Tecrîd hê jî didome, me tecrîdê neşikandiye. Min hevalên xwe jî hişt û hatim. Aliyê menewî yê berdewamkirina çalakiyê ya li Girtîgehê mezin e. Li wir kenê hevalê hevalekî jî moral dide mirov, kêfşxweş dike û diqehirîne. Ji ber ku ji hevalên veqetiyam gelekî xemgîn im."
DEWLET PAŞDE GAV DAVÊJE'
Yîgît anî ziman ku ji bo wan rakirina tecrîdê ji tenduristiya wan girîngtir e û wiha qala çalakiya greva birçîbûnê kir: "Çalakiya me encam digire. Dewlet paşde gav davêje. Me dît ku piştî 8 salan parêzeran bi Ocalan re hevdîtin pêk anî. Bi vê çalakiya me dît ku dewlet çiqas ditengije. Çalakiya me liğ her dera cihanê berbelav bûye. Ji ber vê sedemê dewlet tengijî û neçar ma ku gav bavêje. lewra çalakiya me mezin dibe."
'JIYAN BERXWEDAN E'
Yîgît destnîşan kir ku daxuyaniya parêzeran a têkildarî hevdîtina bi Ocalan re bê dayîn ji bo wan gelek girîng e û axaftina wiha bi dawî kir: "Çi dibe bila bibe, dê çalakiya me bidome. Lewra em zanîn ku jiyan berxwedan e."
MA / Ahmet Kanbal