STENBOL - Hevberdevka HDK'ê Gulîstan Kiliç Koçyîgît, di Civîna Meclîsa Giştî ya 2'yan a HDK'ê de bal kişand ser daxwaza çalakgerên greva birçîbûnê û bêdengiya hikûmetê şermezar kir. Koçyîgît, got: "Divê em li kuçeyan xwedî li daxwazên wan derkevin."
Civîna Meclîsa Giştî ya 2'yan a Kongreya Demokratîk a Gelan (HDK), li navenda giştî pêk hat. Gelek kes tev li civînê bûn. Ewilî Hevberdevka HDK'ê Gulîstan Kiliç Koçyîgît axivî.
Koçyîgît, bi bîr xist ku Hevseroka KCD'ê Leyla Guven 157 roj in di greva birçîbûnê de ye û bêdengiya hikûmetê şermezar kir. Koçyîgît, daxwaza çalkgerên greva birçîbûnê dubare kir û got: "Daxwaza wan di Qanûna Bingehîn û peymanên navnetewî de hene. Lê mixabin heta niha hikûmetê ji bo vê yekê tu tişt jî nekiriye. Her wiha cenazeyên 7 girtiyan jî bi awayekî dermirovahiyî hatin veşartin. Dewletê mafê veşartinê û mafê şîngirtinê xesp kir."
‘EM Ê RASTIYÊ NÎŞANÎ KESÊN KOR BIDIN'
Koçyîgît ku got "Divê em ji bo ragihandina dengê xwe li hin rê û rêbazan bigerin" û got: "Em mecbûr in dengê xwe ragihînin kesên ker û em mecbûr in rasiyê nîşanî kesên kor bidin. Ev yek jî bi têkoşîna hemû derdorên civakê, bi têkoşîneke demokratîk, aştiyane û rewa li li kuçe û kolanan pêkan e. Em careke din dest nîşan dikin ku tişta em esas digirin mafê jiyanê ye."
‘DIVÊ EM XETA BERXWEDANÊ BIBÎNIN'
Her wiha Koçyîgît, bal kişand ser çalakiyên greva birçîbûnê yên li Filîstînê jî û got: "Niha li Filîstînê jî nêzî 400 heb girtî li dijî şert û mercên girtîgehan di greva birçîbûnê de ne. A rast çalakiyên li wir jî li dijî astengkirina mafê hevdîtinê, mafê pêwendiyê ne. Di vir de polîtîkaya hikûmeta AKP û hikûmeta Îsraîlê dişibin hevdu."
Koçyîgît, bal kişand ser hilbijartina herêmî jî û destnîşan kir ku helwesta hikûmetê helwesteke antîdemokratîk e û niha saziyên dewletê veguherîne partiyan. Koçyîgît, ji bo stratejiya HDP'ê ya di hilbijartina 31'ê Adarê de jî got, stratejiya HDP'ê îmzeya xwe daniye bin serketineke muazem û li rojavayê Tirkiyeyê bi tifaqa AKP-MHP'ê daye windakirin û li Kurdistanê jî piraniya şaredariyan bi dest xistiye.
Her wiha Koçyîgît, ji bo helwesta YSK'ê ya di vê hilbijartinê de jî diyar kir ku YSK'ê qesda hebûna xwe kiriye û got: "Em nikarin behsa hebûna YSK'ê bikin."
‘KESÊN DESTEK DAN DAIŞ'Ê TÊK ÇÛN'
Koçyîgît, bal kişan ser têkşikandina DAIŞ'ê jî û got: "Di warê têkşikandina DAIŞ'ê de em kesên tev geriyan û bi legehngî têkoşiyan silav ddikin. Têkoşîna yekbûyî ya gelan DAIŞ'ê ku dixwest Rojhilata Navîn veguherîne tarîtiya sredema navîn, têkşikandiye. Di şexsê DAIŞ'ê de kesên destek didan DAIŞ'ê jî têkşikiyan."
LI DIJÎ TECRÎDÊ WÊ DAKEVIN QADÊN 1'Ê GULANÊ
Koçyîgît, ji bo 1'ê Gulanê Cejna Karkeran a Cîhanê bang li her kesî kir û got: "Em hêvîdar in ku 1'ê Gulana îsal de hem li dijî tecrîdê û hem jî li dijî krîza aborî ya ku tê xwestin li karker û kedkaran bê barkirin bibe cihê bilindkirina têkoşînê."