EDENE - Birayên hev Fûrkan û Nûrûllah Ûgûr ku di dema qedexeya derketina derve ya Şirnexê de mala wan hat rûxandin û li ser beyanên şahidan hatin girtin bang li raya giştî kirin û gotin: "Dengê me ragihînin. Bibin dengê me."
Çalakiya greva birçîbûnê ya Hevseroka Kongreya Civaka Demokratîk (KCD) û Parlementera HDP'ê ya Colemêrgê Leyla Guven ku li dijî tecrîdkirina Rêberê PKK'ê Abdullah Ocalan da destpêkirin di roja 127'an de didome. Her wiha bi heman daxwazê çalakiya greva birçîbûnê ya di 16'ê Kanûna 2018'an de li gelek girtîgehan dest pê kir jî di roja 88'an de ye. Her wiha di 1'ê Adarê de li tevahiya girtîgehan çalakiya greva birçîbûnê ya bêdem û nedorveger dest pê kir.
Ji girtiyên greva birçîbûnê 2 jê jî birayên hev Fûrkan û Nûrûllah Ûgûr in. Piştî qedexeya derketina derve ya li Şirnexê mala malbata Ûgûr hat rûxandin û malbat berê xwe da Ceyhana Edeneyê. Fûrkan Ûgûr ku 3 sal berê li Şirnexê hat binçavkirin, li ser beyanên şahidan hat girtin û cezayê muebetê lê hat birîn. Niha Ûgûr di Girtîgeha Jimare 1 a Xarpêtê de ye û ji 21'ê sibatê ve di greva birçîbûnê de ye.
HER DU BIRA DI GREVA BIRÇÎBÛNÊ DE NE
Piştî Fûrkan Ûgûr hat girtin, 5 meh şûnde bavê wî Ramazan Ûgûr jî li ser îfadeyên şahidan hat binçavkirin û pêşî ew şandin Girtîgeha Ceyhanê, paşê jî sewqî Girtîgeha Midyadê hat kirin. Du sal berê dema Nûrûllah Ûgûr ji bo hevdîtina bi bavê xwe re pêk bîne çû girtîgehê, lê belê ew jî li ser beyanên şahidan hat binçavkirin û wî şandin Girtîgeha Tîpa H a Dîlokê. Nûrûllah Ûgûr jî ji 20'ê Sibatê ve di greva birçîbûnê de ye.
Her du birayan peyamek ji raya giştî re şandin. Avşîn Ûgûr ku bavê wê û du birayên wê di girtîgehê de ne, diyar kir ku îdareya girtîgehê 20 roj cezayê hucreyê li birayê wê Fûrkan Ûgûr biriye.
'DENGÊ ME RAGIHÎNIN'
Avşîn Ûgûr anî ziman ku birayê wê gotiye: "Bi awayekî zêde em bi zext û zoriyan re rû bi rû dimînin. Gardiyan tim êrîşî me dikin. Di êrîşan de milê du hevalên me şikiyan. Rojname û pirtûkan nadin me. Me dixin hucreyan û derb dikin. Ji roja me dest bi greva birçîbûnê kiriye êrîş jî zêde bûne. Lê heta tecrîd neyê şikandin wê çalakiya me dewam bike. Bedêl çi dibe bila bibe wê çalakiya me dewam bike. Zext û zorî didomin. Gelek kes xistine hucreyan. Êdî be es. dengê me ragihînin. Li derve bibin dengê me."
Avşîn Ûgûr, anî ziman ku ew ê bibin dengê berxwedana çalakgeran û xwest berî mirin çêbibe rojek berî rojekê daxwaza girtiyan bê qebûlkirin.
MA / Hamdullah Kesen