Hevseroka Kongreya Civaka Demokratîk û Parlamentera HDP’ê Leyla Guven di 8’ê mijdara 2018’an de li girtîgehê ji bo rakirina tecrîdkirina Rêberê PKK’ê Abdullah Ocalan dest bi greva birçîbûnê kiribû. Guven piştî ji girtîgehê hat berdan jî li mala xwe çalakiyê dewam kir û di roja 124’emîn de didomîne. Bi dû Guven re di 16’ê kanûna 2018’an de girtiyan jî li girtîgehan bi armanca rakirina tecrîdê dest bi greva birçîbûnê kirin. Di 1’ê Adarê de jî greva birçîbûnê li tevahiya girtîgehan belav bû û hat destpêkirin. Mazlum Teke yê li Girtîgeha Tîpa D a Amedê ev 2 sal in girtî ne dest bi greva birçîbûnê kir. 

 

PIŞTÎ NESRÎNÊ BÛ DAYIKA AŞTIYÊ 

 

Dayika Teke, Nezahat Teke ku bi salan e dayika aştiyê ye der barê çalakiya kurê xwe de axivî. Dayik Teke di heman demê de dayika Nesrîn Teke ya di 10’ê tîrmeha 2000’î de li Amedê bi dirûşma “Bê Ocalan qet nabe” xwe şewitand û tecrîdkirina Ocalan şermezar kiribû ye. Teke got ji roja keça wê xwe şewitandiye heta îro ji bo aştiyê têdikoşe û li dijî şer li ber xwe dide. Teke da zanîn ku hevjînê wê jî ji ber dozê lê hatin vekirin neçar ma û derkeve derveyî welat û ew keçek xwe bi tenê dijîn. 

 

‘EM Ê BÊDENG NEMÎNIN’ 

 

Teke diyar kir ku kurê wê ji ber di nava zextan de mezin bû niha girtî ye û got: “Keça min ji bo şermezarkirina tecrîdkirina Ocalan bedena xwe da ber agir. Îro jî Mazlum bi hezaran hevalê xwe re li dijî tecrîdê bedena xwe daye ber mirinê. Bila kes ne li bendê be ku em wek dayikan bêdeng bimînin. Ku zarokên me birçîbin em ê çawa rehet bijîn.”

 

JIYANA WÊ BI DU DIRÛŞMAN DERBAS BÛ 

 

Teke anî ziman ku jiyana wê bi berzkirina dirûşmên “Bila însan nemirin” û “Dayik negirîn” re derbas bû û wiha domand: “Ev 20 sal in ez ji bo aştiyê têdikoşim. Min keça xwe ji bo daxwaza milyonan winda kir. Bila kîn, nefret û mirin pêk neyê. Bi mehan e mirovan bedena xwe daye ber mirinê. Guh û çavê xwe ji vê daxwazê re digirin. Divê dayik bikevin tevgerê. Divê ji xewa mirinê rabin û ji ser xwe biavêjin. Eger ji girtîgehan darbestek jî derkeve wê bibe sedema rewşên xerab. Heke şehadet pêk werin dê li girtîgehan serhildan dest pê bike. Kes nikare pêşiya vê bigire.” 

 

‘DAYIKEK JI BO ZAROKÊN XWE DIJÎ’ 

 

Teke destnîşan kir ku dayikek ji bo zarokê xwe dijî û wiha got: “Dayikek dikare birçî rakeve lê kezeba wê bar nade ku ku zarokên wê birçî bimîne. Lê mixabin îro zarokên me birçî ne û em jî bi rehetî dikarin rakevin. Ev ji bo dayikan şermek mezin e. Nesrîn bedena xwe da ber agir. Tovê Nesrînê aj da û îro bi hezaran Nesrîn heman têkoşînê didin. Ji bo dayikek din negirî ez têdikoşim. Ji bo vê yekê divê dayik li mala xwe rûnenê.” 

 

‘JI MIRINÊ WÊDETIR TIŞTEK HEYE?’

 

Teke xwest gelê Amedê li hember çalakiya grevên birçîbûnê hin bêtir hestiyar bin û wiha got: “Ji mirinê wêdetir tiştek din heye? Ez tenê ne ji bo keça xwe têdikoşim. Divê hemû dayik ji bo zarokên xwe bi hev têbikoşin. Dibe k udîn, irq û fikra me cuda be lê rengê hêsirên çavê me eynî ye.” 

 

MA / Ozgur Paksoy- Mehmet Şah Oruç