Rêxistina Partiya Demokratîk a Gelan (HDP) di çarçoveya xebatên hilbijartinê de li Navçeya Qereqoçan a Xerpêtê bi gel re hatin cem hev. Di civîna gel de Hevserokê Giştî yê HDP'ê Sezai Temellî û Hevserokê Gişti yê Partiya Herêmên Demokratîk (DBP) Mehmet Arslan amade bûn. Heyeta HDP'ê ku hevserokên HDP'ê û DBP'ê di navde bi karwana sedan maşîne derbasî Navçeya Qereqoçanê bûn û rastî eleqeyek mezin hat. Temelli û Arslan li vir gel slav kirin. Bi sedan jin, zarok, kal û pîrên ku li qadê kom bûn bi alên HDP'ê coşek mezin ava kirin. Ewil Hevserokê Giştî yê DBP'ê Mehmet Arslan, axivî û wiha got: "Qereqoçan warê Mazlum Dogan e. Agirê ku Mazlum Dogan pêxist niha hevrêyên wî vî agirî geş dikin. Agirê ku Mazlum Dogan geş kir û belav dibe dê vî welatî azad bike. Yên ku vîna gelan tune dihesbîne, hilbijêran ceza dike, bi zilm û zorê bajaran bi rêve dibe, êdi cihê wan li vir tune ye. Li dijî siyaseta qirêj a AKP'ê ku vîna kurdan tune dihesibine gel teqez dê di hilbijartinê de bi ser bikeve. Em dê bi hevkariya gelê xwe dawî li vê rejîma faşîzt bînin." 

 

'VÎNA KURDAN VÎNA MAZLUM E'

 

Aslan, êrîşa polîsan a li dijî avahiya HDP'a Amedê jî şermezar kir û wiha got: "Yên nikarin vîn û biryara gelê kurd bişkînin, diçin bi ser avahiyên kurdan de digirin û derî û camên wan dişikînin. Vîna gelê Kurd vîna Mazlum Dogan e." 

 

Namzetên HDP'ê yên Hevşaredariya Qereqoçanê Mahmut Ercan û Sever Uzun jî derketin ser dikê û gel silav kirin. Xwişka Mazlum Dogan Serap Dogan Mutluk ku namzetiya wê ji aliyê YSK'ê ve hat betalkirin axivî û wiha got: "Qerekoçan ya me ye. Ez çalakiya hemû çalakgerên li hundir û derve silav dikim.  Namzetên Qereqoçanê Sever Uzun ji ani ziman ku ew dê li dijî qeyûm dest bidin hev û teqez bi ser bikevin. Namzet Mahmut Ercan jî anî ziman ku ew dê teqez bi ser bikevin. 

 

'EM KURD Û TIRK BI HEVRE NE'

 

Hevserokê Giştî yê HDP'ê Sezai Temellî jî helwesta Serokê AKP'ê Tayyip Erdogan rexne kir û wiha got: "Ez kurd im, tirk im. Em li vir in. Em dê heta dawî bi hevre bin. Em dê kurd û tirk bi hevre aştî, demokrasiyê bînin ser vê axê. Ji ber ku ji vê biryarê ditirsin bi şev û roj êrîşî HDP'ê dikin. Dixwazin kurdan bikin dijminê HDP'ê. Êdî dijminantiya xwe ew qas aşkere dikin bi gotina 'Bicehimin biçin' tînin ziman. Têkoşîna me dê bidome. Em naçin ev der warê me ye. Yên di 31'ê Adarê de biçin ev hikûmet e. Dozger, Walî, Qeymeqam û hemû karmendên cemaweriyê dikin şirîkê xwe yê vê xebata qirêj. Di demek nêzîk de hiquq û edalet dê li vî welatî vegere. Em dê yek bi yek hesabê wan bipirsin. Rêya astengiya li pêş greva birçîbûnê ne şikandina cam û deriyan e. Divê daxwazên wan pêk bînin. Ger ku hûn tecridê rakin û daxwazên wan pêk bînin ji xwe dê dest ji grevê berdin. 

 

LEYLA 122 ROJIN DENGÊ XWE BILIND DIKE

 

Leyle Guven 122 rojin dengê xwe li dijî bê hiqûqî û Bê edaletiyê bilind dike. 122 rojin dengê xwe bilind dike. Ji bo aştî bê vî welatî têdikoşe. Em dengê Guven bilintir bikin û bibin dengê wê. Ez bang li Wezîrê Dadê dikim. Dawî li vê bê edaletiyê bînin. Bila malbat u parêzerên Birêz Ocalan demek berî demekê hevdîtin bikin. Ev meseleya hiqûqî ye. Ez bang li hemû rêxistinên demokratîk û sivîl dikim. Em ji bo edalet û hiqûqê bên cem hev. Îktîdar êdi afîşên kurdî jî tehamul nake. Tişta qeyûman li van bajaran kir ewil tabelayên kurdî rakirin. Tehamulî kurd û kurdîtiyê nakin. Em ji doz û têkoşîna xwe gavan paşve navêjin. 

 

Di 5 salêm dawî de 500 hezar esnafan dikan girtin. Esnaf êdî nikare deynê xwe bide." 

 

Temellî piştre bi dirûşme û coşek mezin ji Navçeyê veqetiya.