Hevserokên Giştî yên HDP'ê Pervîn Bûldan û Sezaî Temellî, di çarçoveya xebatên hilbijartina 31'ê Adarê de, ji 1'ê Adarê ve ji du milan ve ketin nav liv û tevgerê. Biçin kuderê, bi moral û coşeke mezin tên pêşwazîkirin û kesên bi wan re jî bi vê coş û moralê bernameyên xwe amade dikin. 

 

Ez jî ji 1'ê Adarê ve otobêsa hilbijartinê ya Bûldan dişopînim. Bi alîkariya hevalên xwe, di dest min de wênegir û di hemêza min de komputera min, nûçeyan amade dikim. Lê ji bilî nûçeçêkirinê, hin tiştên din jî hene. Gelo ew kes çi dikin? 

 

Her kes bênavber dixebite. Geh bêxewî heye geh jî westan. Bi taybetî jî, hilbijartina otobêsê ku biçe kuderê hêviyê li mirovan peyda dike bi ked û tahbeke mezin tê amadekirin. 

 

Ên ewilî dest bi rojê dikin ajovan, anonsvan, ekîba teknîkê û çapemenî ye. Şeveqê zû hundirê otobêsê tê paqijkirin û paşê tê amadekirin û dû re bi rê dike. Heta niha otobês çûye Cizîr, Silopiya, Hezex, Şirnex, Qileban, Bêşebab, Colemêrg, Gever, Elbak, Westan, Erdîş û navenda Wanê. Di dema çûyînê de leqayî bi dehan noqteyên leşker û polîsan tê. Li hin deveran tê sekinandin û li nasnameyan tê nerîn. Lê belê dema otobês nêzî navçe û bajaran dibe, dengê muzîkê heta dawiyê tê bilindkirin. 

 

Anonsvan Talat Yeşîl ku bi dirûşmeya "Serkeftin Ya Me Ye" coşeke mezin li girseyê peyda dike; teknîkvan jî bi muzîkên dide ser govendê bi gel dide gerandin; Ercan Altûntaş jî bi wêne û dîmenên digire coşa xwe dide der mayînde dike û ajovan Yucel Narîn jî bêyî bêje şev û roje e, di mij û moranê, di kend û kospan de dîreksiyon li ba dike. Hemû jî dibêjin betlandin heye, lê belê dîsa jî kêfxweş in. 

 

Ajovan Yucel Narîn dibêje: "Li bajarok, navçe û bajarên em diçinê, wexta em çav bi ronahiya di çavên zarokan û hêviya di çavên dayikan de dikevin, westandin û tempoya kar qet ji bo nabe asteng. Li Silopiyayê, Ahmet tevî sindoqa xwe ya boyaxê dibeziya. Ev yek tesîr li me hemûyan kir. Wexta em tiştên wisa dibînin, bi navê westandinê tiştek nayê bîra me. Çimkî, em ber bi hêviyê ve dibezin." 

 

Narîn ji bo lêgerîna wesayîtê jî dibêje: "Otobêsa tu partiyên din nayê sekinandin û tew bi ser de polîs eskortiyê ji wan re dikin. Lê belê em diçin kuderê em bi astengiyan re rû bi rû dimînin." 

 

Li gor anonsvan Talat Yeşîl, tişta herî zehmet amadekarina "paşvîtrinê" ye. Yeşîl, ji bo karê xwe jî diyar dike ku wexta peyvek jî şaş bê gotin, ew pey dive sedema serobinobûna atmosferê. Yeşîl dibêje: "Çimkî, li wir rewşeke ku bi kar û barên mezin hatiye amadekirin heye. Ger hûn pêşkeşiyeke baş nekin, wê ev yek rewşeke neyînî li gel peyda bike. Sahne xwedî rewşeke efsûnî ye. Girse, bi coş e. Em derdiekvin pêşberî vê coşê. Di wê kêliyê de eger hûn xwe negihînin girseyê, wê enerjiya girseyê kêm bibe." Her wiha Yeşîl bilêv dike ku her çend biwestin û karê wan zehmet be jî wexta ew û gel tên cem hevdu bi navê westandinê tiştek namîne. 

 

Ercan Alûntaş ku wêne û dîmenên girseyê digire jî, bilêv dike ku coşa girseyê cihê kêfxweşiyeke mezin e û dibêje: "Em wêneyan çawa bigirin, em ewqasî enerjiyê li girseyê peyda dikin. Wexta em di wêne û dîmenên li ser medyaya civakî tên parvekirin enerjiyekê nedin der, ev yek dibe ku tesîrê li qadên din jî bike. Loma em hewl didin ku em tiştên hîn xweşiktir bigirin." 

 

MA / Zuhal Atlan