MÊRDÎN – Dadgehê der barê mirina Mazlûm Tûranê 16 salî de, sal û 10 meh û 15 roj ceza li polîsê bersûc birî lê belê cezayê hat birîn jî taloq kir. Parêzer Erdal Kûzû, Ûgûr Kaymazê 14 sal berê hat kuştin bi bîr xist û got: "Feraseta darazê neguheriye, her diçe xirabtir dibe."
Li navçeya Qoser a Mêrdînê, di 28'ê Tebaxa 2015'an de polîsan bi îdiaya "guh nedaye hişyariyê" Mazlûm Tûranê 16 salî kuştin. Piştî kuştina Tûran der barê polîsê bi navê Suleyamn Esenboga de doz hat vekirin û çend roj berê dadgehê biryar da. Li Dadgeha Cezayê Giran a 1'ê ya Mêrdînê dozger diyar kir ku "bi qesdî hatiye kirin" û xwest li bersûc cezayê muebetê bê birîn. Lê belê dadgehê tenê sal û 10 meh û 15 roj ceza li polîsê bersûc Esenboga birî û cezayê birî jî taloq kir.Parêzer Erdal Kûzû ku berê di doza Ûgûr Kaymaz de jî cih girtibû û parêzerê doza Tûran e jî got: "Di doza zarokên ku bi guleyên qanûnî hatine kuştin û bêceza hatine hiştin, dosyeyeke din jî cih girt."
Kûzû, destnîşan kir ku di dozên der barê mirinên sivîl de bêcezatî êdî veguheriye pêkanîneke sîstematîk û ji roja ku dewlet hatiye avakirin heta niha polîtîkayên bêcezatiyên pêk tên. Kûzû, anî ziman ku di darizaninên bi vî rengî de ji mexdûr bêtir sifet, nasname û peywira bersûc esas tê girtin û got: "Ev wesf jî ji bo bersûc tên nirxandin û dibe sedem ku ceza li bersûc neyê birîn. A rast ev feraseta darazê ye."
'HÎN XIRABTIR BÛ'
Kûzû, bilêv kir ku biryara hatiye dayîn bi awayekî aşkere nîşaneya "nebûna darizandineke bêalî û serbixwe" ye. Kûzû, doza Ûgûr Kaymazê 12 salî ku di 2004'an de li Qoserê bi 13 guleyan hat kuştin bi brî xist û destnîşan kir ku feraseta di darazê de xirabtir bûye. Kûzû got: "Di qanûnan cezayî de beramberiya qanûnî ya kuştina zarokekî 16 salî heye. A girîng, hebûna dadgerên wêrek e ku van qanûnên cezayî pêk bîne. Lê belê em baş dizanin ev yek tune ye. Ev jî tê wateya feraseta darizandineke bi aqilê dewletê."
'TIRKIYE VEGUHERIYE GORISTANA ZAROKAN'
Kûzû, destnîşan kir ku biryarên ji aliyê darazê ve tên dayîn nîşan dide ku li Tirkiyeyê mirov çi qas bêqîmet in û got: "Di darazê de tu tişt neguherî. Her wiha neyta guherandinê jî tune ye. Wexta peywirdarekî dewletê û welatiyekî sivîl tên hemberî heve, peywirdarê dewletê tê parastin. Di dosyeya Mazlûm Tûran de jî ev yek hat kirin. A rast armanca van dozan ew e ku; ji bo careke din pêk neyê divê cezayekî ku herkes qebûl bike bê dayîn da ku bikaranîna çekê ya hêzên dewletê kêm bibe. Lê belê bi polîtîkaya bêcezakirin ev bûyer didomin. Tirkiye, veguheriye goristana zarokên kuştî."
WÊ SERÎ LI DADGEHA CEZAYÊ GIRAN A 2'YAN BIDIN
Kûzû, bilêv kir ku rê li ber şandina dosyeyê ya ji bo temyîzê hatiye girtin, ji ber vê ew ê serî li Dadgeha Cezayê Giran a 2'yan a Mêrdînê bidin û îtiraz bikin. Kûzû, da zanîn ku eger li vir jî îtiraza wan encam negire ew ê serî li Dadgeha Qanûna Bingehîn (AYM) bidin.
MA / Ahmet Kanbal