Hikûmetê di çerçoweya Rewşa Awarte de bi KHK'ya Jimare 696'an ku di 24'ê Kanûna 2017'an de hat weşandin ji bo girtî û hikumxwaran pêkanîna "kincên yektîpî" anî. Lê belê piştî ku girtiyan bertek nîşanî vê yekê de, ev pêkanîn rawestiya. Lê belê tê gotin li girtîgehên li herêma Marmarayê li girtiyên siyasî "jiyana yektîpî" tê ferzkirin. Hevberdevka Şaxa Platforma Hiqûqnasên Azadîxwaz (OHP) Îlknûr Alcan, binpêkirinên mafan ên li girtîgehên herêma Marmarayê vegotin. 

 

Parêzer Alcan bilêv kir ku bi taybetî di demên dawî de çewisandinên li ser girtiyan zêde bûne û di avêtina ser qawîşan de radyoyên girtiyan jî hatine berhevkirin. Alcan, da zanîn ku gardiyan ji nişkave davêjin ser qawîşan û di avêtina ser qawîşan de nîşeyên ku girtî girtine, pirtûkên wan û metnên bi kurî yên bi destan hatine nivîsandina hatine topkirin û got: "Her wiha nîşeyên ku ji bo parêziyên xwe girtine û pirtûkên ku di girtîgehê de nivîsandina jî ji wan stendine. Hin hejmarên ekvn ên rojnameyan jî kom kirine. Muwekîlên me yên ku nexwestine bidin jî, bi muameleyeke nebaş nêzî wan bûne." 

 

Alcan, diyar kir ku hîn jî sînordarkirina pirtûkan didome û girtiyên ku nikarin pirtûkên xwe bigirin jî bi zorê odeyên wan guhertine û di dema guhertina odeyan de dest danîne ser pirtûkên wan. 

 

Parêzer Alcan, da zanîn ku nameyên ku hatine şandin jî nadin girtiyan û got: "Mesel hefteya borî min hevdîtin bi muwekîlê xwe yê li Edîrneyê re çêkir. Dema min hevdîtin çêdikir nameyek jê re hat. Hema bêje nîviyê nameyê tune bû. Komîsyona xwendina nameyan a Edîrneyê ser nameyê xêz kiriye. Name ji Girtîgeha Kandirayê hatibû. Ew name di ber destê komîsyona xwendinê ya li wir re derbas bûye, lê girtîgeh vê yekê qebûl nake û nîviyê nameyê rewş dike. Em kêfiyetî ye. Li gelek girtîgehan ev tişt hene. Li dadweriyên înfazê îtirazê dikin, lê belê ji ber ku pêkanîna girtîgehekê ne li gor girtîgeheke din e, ev yek li gorî kêfiyeta îdareyê tê hiştin." 

 

‘KESÊN JIMARIYA LI SER PIYAN QEBÛL NAKIN LÊDANÊ DIXWIN' 

 

Alcan, bilêv kir ku hefteya borî hevaleke wan a jin çûye Girtîgeha Jinan a Bakirkoyê, her çend wekaletnameya wê hebûye jî, lê ji ber wekaleta wê ya wasîbûnê tune bûye nehiştine bi muwekîlê xwe re hevdîtinê çêbike û got: "Halbûkî li gorî Qanûna Parêzeriyê belgeya karbidestiyê, di hukmê wekaletê de ye û me heta niha wisa hevdîtin çêdikirin. Lê ev yek li Bakirkoyê dest pê kir. Dibe ku girtîgehên din jî wisa bikin. Dê ev yek bi xwe re nehiqûqiyeke mezin bîne." 

 

Alcan, destnîşan kir ku li girtîgehê jimariya li ser piyan, lêgerîna tazî û hwd. li girtiyan tê ferzkirin, lê belê ev yek bêhiqûqî û kêfiyetî ye û bi vî awayî "jiyana yektîpî" li girtiyan tê ferzkirin. 

 

Alcan, da zanîn ku li ser serlêdanên derbarê binpêkirina mafan de wan jî di warê hiqûqî de serlêdan kirine û got: "Ji ber ku gelek muwekîlên me jimariya li ser piyan qebûl nekirine, gardiyanan ew derb kirine. Cezayê dîsîplînê li gelekan hat birîn. Hîn jî hin dosye li dadweriya Înfazê û AYM'ê ne." 

 

Alcan, destnîşan kir ku tiştên li girtîgehan diqewimin di raya giştî de nabin rojev û got: "A rastî binpêkirina mafan herî zêde di girtîgehan de pêk tê. Divê raya giştî bêtir hesas be. Nemaze jî rewşenbîr, nivîskar û siyasetmedar hesas tev bigerin. Di vî warî de saziyên herî girîng jî baro ne. Lê mixabin komîsyonên mafên mirovan ên bariyan bi awayekş aktîf naxebitin. Eger pir bixebitiyana, dê li girtîgehan ev qas maf nehatanan binpêkirin." 

 

MA / Muhammet Dogru