AMED - Omer Atalay di dema qedexeya derketina kolanan a li Sûrê de hatibû girtin. Piştî Dadgeha Bilind biryara cezayê birî, doza Atalay jinûve hat lidarxistin. Dadgehê 11 sal û 3 meh cezayê hefsê da Atalay.
Welatiyê bi navê Omer Atalay di dema qedexeyên derketina kolanan ên li navçeya Sûr a Amedê de, di 7’ê Adara 2016’an de bi birîndarî hate binçavkirin û di 11’ê Adara 2016’an de jî hate girtin. Atalay, bi îdiayên “xerakirina yekitî û yekparetiya dewletê” û “hewl da kesekê ku karê xwe yê cemaweriyê bicih bîne bikuje” tê darizandin. Dadgeha Bilind biryar dabû ku Atalay jinûve were darizandin. Danişîna dozê li 5’emîn Dadgeha Cezayên Giran a Amedê hat lidarxistin. Atalay ku li Girtîgeha Hejmar 2 ya bi Ewlekariya Bilind a Amedê tê ragirtin û parêzerê wî di dozê de amade bûn. Malbata Atalay jî tev li bû.
‘LI ŞAHIDÊN EZ NAS NAKIM HATE GUHDARÎKIRIN’
Di danişînê de ji ewil Atalay axivî û li dijî mutalaayê parastina xwe kir.
Atalay, got: “Min bi zehmetî mutalaa fêm kir. Dadgeha Bilind bi leha min biryar xera kir. Dadgeha Bilind xwest kêmasiyên heyî bên temamkirin. Li du şahidan dîsa hate guhdarîkirin lê li dijî min tiştek nehat gotin. Min jixwe têkiliya xwe ya bi rêxistinê re di dema darizandinê de gotibû. Min bi eşkereyî got ku endamê rêxistinê me. Ez her du şahidan jî nas nakim. Her du şahidan jî bi leha min îfade dan. Ez û şahid tu caran rû bi rû ne anîn cem hev. Şahidên ez nas nakim li dijî min weke delîl tên bikaranîn. Ev ne adilane ye. Dozger dibêje ku min berîqet daniye, xendek kolaye û ketime pevçûnê lê yek delîleke şênber tune ye. Rewşa min a fîzîkî rê nade ku çekê bi kar bînim. Dibêje ‘hewldaye kesekî ji ber peywira cemaweriyê bikuje.’ Ji bo hewldanê divê planek hebe. Ez tu bi tu awayî tev li tiştekî wiha nebûm. Min tu xebatkarên cemaweriyê jî hedef negirtiye. Ez daxwaza tehliye û beraeta xwe dikim.”
Parêzerê Atalay jî bi bîr xist ku Dadgeha Bilind xwestiye çalakiyên behsa xeberê bên şênberkirin û divê Atalay ji ber çalakiyên nehatine îspatkirin neyê cezakirin. Parêzer, daxwaza beraeta miwekîlê xwe kir.
11 SAL Û 3 MEH CEZAYÊ HEFSÊ HATE DAYIN
Şandeya dadgehê jî biryara xwe da û ji îdiaya “Hewl daye kesekî ji ber karê cemaweriyê dike bikuje” biryara beraetê da. Dadgehê, ji hêla îdiaya “xerakirina yekitî û yekparetiya dewletê” jî got ku delîl tune ne û bi îdiaya “endamtiya rêxistinê” 11 sal û 3 meh cezayê hefsê da. Dadgehê biryar da ku rewşa girtî ya Atalay bidome.
DER HEQÊ DOZÊ DE
Welatiyê bi navê Omer Atalay di dema qedexeyên derketina kolanan ên li navçeya Sûr a Amedê de, di 7’ê Adara 2016’an de bi birîndarî hate binçavkirin û di 11’ê Adara 2016’an de jî hate girtin. Der heqê Atalay de bi îdiayên “xerakirina yekitî û yekparetiya dewletê” û “hewl da kesekê ku karê xwe yê cemaweriyê bicih bîne bikuje” doz hate vekirin. Di danişîna biryarê ya 22’yê Îlona 2020’ê de 5’emîn Dadgeha Cezayên Giran a Amedê 4 caran cezayê muebbeta girankirî da. Ceza, ji hêla Îstînafê ve jî hate erêkirin. Parêzerê Atalay, li dijî biryarê li Dadgeha Edliyeya Herêmê ya Amedê îtîraz kir. Daîreya Cezayan a 9’an a Dadgeha Edliyeya Herêmê ya Amedê jî di 3’yê Adara 2021’ê de dosya red kir û ceza erê kir. Piştî ku Îstînafê jî biryar erê kirî, parêzer serî li Dadgeha Bilind da. Daîreya Cezayan a 3’yan a Dadgeha Bilind di 27’ê Gulana 2024’ê de biryar derhiqûqî dît û biryar betal kir. Piştî biryara betalkirinê ya Dadgeha Bilind, doza Atalay li 5’emîn Dadgeha Cezayên Giran a Amedê jinûve hat lidarxistin.