NAVENDA NÛÇEYAN – Li gelek bajar û navçeyan gel di bernameyên fitarê ya di Şeva Leyletul Qedir de hat gel hev. Di bernameyan de ji bo erdnîgariya Rojhilata Navîn aştî, aramî û biratî hat xwestin û banga yekîtiyê hat kirin. 

 

Namzetên HDP’ê yên Edeneyê bi roj li gel hewa germ û bi rewa welatî û esnafan ziyaret dikin û bi şev jî tev li civînan dibin  û vekirina buroyan pêk tînin. Namzetê HDP’ê yê Edeneyê Sever Uzun ji serê sibê heta saetên şevê li taxa Meydan û Gulpinar kolan bi kolan mal bi mal geriya û ji HDP’ê deng xwest. 

 

Li taxa Yamaçli ya Yuregîr a Edeneyê bi tev li bûna namzeta HDP’ê ya Edeneyê Tulay Hatîmogullari buroya hilbijartinê vekirin. HDP’ê her wiha li taxa Misis a Yuregîrê jî buroya hilbijartinê vekir. 

 

MÊRSÎN

 

Li Mêrsînê jî namzetên HDP’ê xebatên hilbijartinê birêve birin. Namzetên HDP’ê yên Mêrsînê di çarçoveya vê xebatê de li navçeyên Tarsûs, Akdenîz, Yenîşehîr, Toroslar û Mezîtlî buroyên hilbijartinê, civînên gel û ziyareta komele, esnaf û malan pêk anîn. 

 

OSMANIYE

 

Namzetên HDP’ê yên Osmaniyeyê Ahmet Eken, Derya Turhan û Muslum Çagan, rêveberên HDP û DBP’ê li navçeya Toprakkale esnaf û gel ziyaret kirin. Namzetan û yên bi wan re li ber stranan govend gerandin. Namzetan esnafan yek bi yek ziyaret kirin û ji bo HDP’ê û Selahattîn Demîrtaş deng xwestin. 

 

ANTALYA

 

HDP li perava Konyaalti ya Antalyayê jî stanta hilbijartinê danî û belavokan li gel belav kirin. HDP’yan li ber muzîkê govend gerand û turîstan jî bi çepikan piştevanî da HDP’ê. 

 

Namzetê HDP’ê yê Antalya Kemal Bulbul li navçeya Kepez tev li şahiyê bû. Bulbul ji bo HDP’ê û Demîrtaş deng xwest û behsa pêvajoya hilbijartinê kir. Bulbul bal kişand ser Şeva Leyletul Qedir û got ku ew hêvî dikin dê ev roja pîroz bibe wesîla yekîtî, hevgirtin, biratî û aştiyê. 

 

ŞIRNEX

 

Li navçeya Hezexê ya Şirnexê jinên HDP’î li kolana Alanya û Kûçeya Hunerê belavokên hilbijartinê balav kirin. Jinan lîland û li erbaneyan dan. 

 

MANÎSA 

 

Li navçeya Şehzadeler a Manîsayê jin di bernameya fitarê de li sofreya ser rûyê erdê kom bûn gelek jin tev li bûn. Jinan xwarina xwe ji malê anîn û mînaka piştevaniyê û komûnê nîşan dan. Namzetên HDP’ê yên Manîsayê Bîrgul Saggoz û Hasret Aslan jî rastî eleqeya jinan hatin. Jin fitirîn û li ser hilbijartinê nîqaş kirin. 

 

DENÎZLÎ

 

Rêxistina HDP’ê ya Denîzlî jî bernameya fitarê ya kevneşopî ku sala 4’emîn tê dayîn li dar xist. Bername li qada Newrozê ya li taxa Esentepe ya navçeya Merkezefendî pêk hat û namzetên HDP’ê yên Denîzlî û nêzî 8 hezar kes tev li bû. Namzetê HDP’ê yê Herêma 1’emîn a Îzmîrê Nurettîn Turgay û namzetê HDP’ê yê Manîsayê Sirri Sakik jî tev li bernameyê bûn. Turgay û Sakik di bernamyê de xîtabî gel kirin û behsa zilma li ser gelan tê meşandin û hilbijartinê kirin. 

 

ÎZMÎR

 

Li Îzmîrê jî Meclîsa Ciwanan a Îzmîrê bernameya fitarê li dar xist. Gelek ciwan tev li bernameyê bûn. Namzetên HDP’ê jî piştevanî dan bernameya ciwanan. Di bernameyê axaftin hatin kirin û gotin ku 24’ê Hezîranê dawiya desthilatdariya AKP’ê ya 16 salan dê bê.