Ji hilbijartina 24'ê Hezîranê re 13 roj man. Her ku hilbijartin nêzîk dibe xebatên partiyên siyasî jî zêdetir dibin. Li herêma Egeyê her ku hilbijartin nêzîk dibe rengê partiyên siyasî yên li pêş bêtir xwe nîşan didin. Herêma Ege ku serdemekê CHP li pêş bû, di hilbijartinên dawî de rengê CHP'ê û AKP'ê ket nava hev û HDP'ê jî xwe li rengê wan zêde kir. Di hilbijartina 24'ê Hezîranê de jî êdî HDP jî li bajarên Egeyê rengê xwe bi awayekî diyarde nîşan dide. Bi taybetî kurd û karkerên mafê wan tê binpêkirin bêtir xwe didin eniya HDP'ê û li cem HDP'ê cihê xwe digirin. Li Aydinê ku warê çandinî û aboriyê ye, HDP bi şev û roj xebatên xwe berdewam dike û armanc dike ku di vê hilbijartinê de 2 wekîlan bibe meclîsê. Aydin bi 14 navçeyên xwe yên çandiniyê derdikeve pêş. Wekî qada çandiniyê tê zanîn. Dîsa navçeyên Dîdîm û Kuşadasi ku aliyekî wan derya Egeye ye bi turîzmê tên nasîn. 

 

Bajarê Aydinê xwedî milyonek û  80 hezar nifûs e. 750 hezar hilbijêrên wê hene. Yek ji bajarê herî nifûsa zêde yê Tirkiye ye. HDP li vî bajarî xebatên xwe li navçeyan û nava zeviyan jî berdewam dike. Li bajarê ku santralên enerjiya jeotermal tên avakirin û xwezaya wê tê wêrankirin, bi nifûsa kozmopolit bajarekî rengîn û pir çandî ye. 

 

Di Hilbijartina 7'ê Hezîranê û 1'ê Mijdarê yên 2015'an de CHP'ê ji sedî 40.6 û 40.8, AKP'ê ji sedî 29.25 û 33.8, MHP'ê ji sedî 18.2 û 15.8, HDP'ê jî ji sedî 8.8 û 7 deng derxistibû. Di referanduma 16'ê Nîsanê de dengê “Erê" ji sedî 35.7 û dengê "Na" ji sedî 64.3 bû. Hilbijêr û welatiyên Aydinê diyar dikin ku di vê hilbijartinê de dê hêza muxalif bêtir deng bistîne û Îtîfaqa Cumhur bêtir dengan winda bike. Bi taybetî ji ber xebatên HDP’ê li bajar zêde dibin eleqeya li hemberî HDP'ê jî zêde dibe. Bertekên li dijî tifaqa AKP-MHP'ê zêde dibe û bandora Partiya ÎYÎ û Saadetê jî êdî xwe nîşan dide. 

 

HDP KOLAN BI KOLAN DIGERE

 

Di hilbijartinên borî de AKP'ê û CHP’ê her yekê 3 wakîl şandin meclîsê. MHP’ê jî 1 wekîl şand meclîsê. Piştî hêjmara wekîlan li meclîsê derxistin 600 wekîlan, li Aydinê jî hêjmara wekîlan derket 8 wekîlan. HDP ku kolan bi kolan, tax bi tax û navçe bi navçe xebatên hilbijartinê dimeşîne, li dijî êrîşan standan li kolanan venake. Lê partiyên din li kolanan standan vedikin. HDP li şûna standan li kolanan digerin û proşûrên xwe diginînin gel û xebatên propaganda dikin. 

 

Li navçeya Efeler a Ayidnê Seroka Bajar a Partiya ÎYÎ Lale Budakli ku stant vekiriye, der barê xebatên partiyên siyasî de agahî dan û wiha got: 

"Li Aydinê pirsgirêka sereke betalî ye. Dîsa Santrala Enerjiyê ya jeotermal mirovan bêzar dike. Em li vir nebin partiya yekem jî em dê bibin partiya duyemîn. Li Aydinê perteka li dijî AKP’ê pir zêde ye. Dîsa rewşa MHP’ê jî wekî ya AKP'ê ye. Potensiyela HDP’ê jî ne kêm e. Rengê xwe nîşan dide. Hêza wê yeke wekîlekî derxe. Divê namzetê Serokomariyê yê HDP’ê Selahattin Demirtaş bi awayekî azad xebatên xwe bimeşîne. 

 

CHP JI XWE BAWER E

 

Namzetê CHP'ê Kemal Gunerî jî bal kişand ser xebatên hilbijartinê û anî ziman ku hêza muxalif serdest e û wiha got: "Li vî bajarî partiya Îktîdar CHP ye. CHP li pêş hemû partiyan e. Ji ber ku partiya li meclîsê îktîdar e li vir nikare biçe deriyê malan. Ew rûyê wan tune ye. Tevî HDP'ê partiyên din ên muxalif jî dikarin wekîlan derxin. 

 

HEDEFA HDP’Ê 2 WEKÎL IN

 

Hevserokê HDP'ê yê Aydinê Bariş Goze jî der barê hewa xebatên hilbijartinê û partiyên siyasî de nerînên xwe parve kirin. Bariş Goze anî ziman ku li Aydinê eleqeya gel a li hemberî partiya wan gelek zêde bûye û wiha got: "Em armanc dikin ku li Aydinê 2 wekîlan bişînin meclîsê. Hem elewî û hem jî kurd dê piştgiriyê bidin HDP'ê. Dîsa beşên din ên demokrat û mafê wan tên binpêkirin jî nêzî HDP'ê dibin. Li Aydinê hêza HDP’ê li pêş xuya dibe. Em bawer dikin ku 2 wekîlan derxin. 

 

TERCÎHA CIWANÊN MALBATÊN CHP’Î, HDP YE

 

Li taxa Çeştepe ya Efelerê jî em derbasi kiraatxaneyek ku alên CHP'ê lê hatine daliqandin û me li hilbijêrên wan guhdar kir. Hilbijêran diyar kirin ku li vir ji sedî 70 girseya CHP'ê ye. Li taxa Çeştepe ku 4 hezar nifûsa wê heye, piranî ji elewî û koçberênk Yugoslav, turkmen û kurdan pêk tê. Ciwanên CHP’î Cengiz Duman, diyar kir ku li Çeştepe dê ji her malek CHP'î dengek ji HDP’ê re derkeve û wiha got: "Xuya dike ku ciwanên CHP’î tevan berê xwe daye aliyê HDP’ê. 

 

HILBIJÊRÊN CHP’Î: EM DÊ PIŞTGIRIYÊ BIDIN HDP’Ê 

 

Li Kratxaneyek din a taxa Çeştepe ku bi alên CHP'ê hatine xemilandin, niqaşên hilbijartinê didomin. Welatiyekî bi navê Metin diyar kir ku ciwan dê bêtir dengê xwe bidin HDP’ê û wiha got: “Tu demê bi qasi niha girîng nebûye ku HDP di meclîsê de cih bigire. Cîgirtina HDP'ê ya meclîsê pir girîng e. Ji ber vê yekê em dê dengê xwe bidin HDP'ê." 

 

DENGÊN AKP’Ê DIÇIN HDP’Ê 

 

Li taxa Ata ya navçeya Efelerê jî zêdetir AKP li pêş e. Lê HDP li vir xebatên îknayê dimeşîne. Li taxa ku nifûsa wê zêdetir kurd û tirk in hilbijêrên ku berê dengê xwe dabûn AKP'ê niha derbasî HDP'ê dibin. Gelek kurdên li vê taxê di hilbijartina berê de dengê xwe dabûn AKP’ê lê vê carê bi biryarin ku dengê xwe bidin HDP’ê. Welatiyê taxê Deniz Sarikan, diyar kir ku kurdan piştî zilma 1'ê Mijdarê zilma AKP'ê dît û baweriya xwe ya li hemberî AKP'ê winda kir û wiha got: "Her ku diçe hilbijêrên li vir ji AKP’ê dûr dikevin. Yên ku berê di AKP’ê de israr dikirin jî niha bê biryar in. 

 

Şaredarê Bajaroka Tellidere yê berê Muzaffer Yondemlî jî diyar kir ku êdî di nava xebatên HDP’ê de cih digire û li Aydinê HDP li pêş e. 

 

MA / Ahmet Kanbal