STENBOL - Namzetê HDP'ê yê Stenbolê Fevzî Gerçek, diyar kir ku dê kurd, elewî, bêkar, ciwan û jin bi HDP'ê bêhnê bistînin û wiha got: “Dê roja 24'ê Hezîranê bibe roja xerakirina saltanatê." 

 

Namzetê HDP'ê yê Herêma 3'yemîn a Stenbolê Fevzi Gerçek, der barê hilbijartinê û namzetiya xwe de axivî. Gerçek ku ji navçeya Niksar a Tokatê ji dayik bû, piştî 18 salî Pirtûkxaneya Remzî ava kir û di nava karê çapemeniyê de cih girt. Gerçek, di sala 1990’an de bû Serokê Giştî yê Tum Saglik Senê. Di salên 1992’an de di kovara Direniş de li ser kurdan nivîs nivîsandin. Ji ber nivîsê xwe hat girtin û 11 meh û 10 rojan hat girtin. Di nava çîna karkeran de têkoşîna xwe berdewam kir. Bi nasnameya xwe ya elewî tev li HDP’ê bû û niha namzetê HDP'ê yê Stenbolê ye. 

 

‘YEKANE ŞENSA ÇARESERIYA PIRSGIRÊKA KURD HDP YE’

 

Gerçek, anî ziman ku ji bo mafên mirovan û demokrasî li her derê belav bibe bû namzetê HDP’ê û wiha got: "Li Tirkiye pirsgirêka sereke, pirsgirêka nenaskirina kurdan e. Heta ku pirsgirêka naskirina kurdan nayê çareserkirin aramî û aştî nayê vî welatî. Ev ne tenê pirsgirêka Tirkiyeyê ye. Tenê şensa Tirkiyeyê HDP ye. Ji ber ku hêzên emperyalizmê li ser Tirkiye lîstikan dilîzin. Hevkarên wan ên li Tirkiye jî piştgiriyê didin wan. Mirov tên kuştin. Dayik hêziran dibarînin. Hemû kesên li dijî şer dibêjin HDP. Divê ev şer bê rawestandin. Em dikarin pirsgirêkê li ser maseyê çareser bikin. Tirkiye dikare di rojhilata Navîn de bibe mînak. Ger ku HDP li meclîsê bibe xwedî hêz dê aramî pêş bikeve. Elewî kurd, bêkar, ciwan, jin dê bi HDP'ê bêhnê bistînin û aram bibin. Ji ber ku AKP'ê xizanî, betalî zêdekiriye. Bi OHAL’ê gelê Tirkiye û Tirkiye bê nefes hiştiye. Ciwan ketine nava çirava tiryakê. 

 

‘EZ DI NAVA HDP’Ê DE ME JI BER KU...'

 

Gerçek, bal kişand ser gotina Erdogan a 'Em dê statuyê bidin cemxaneyan' û wiha got: “Elewî bi salan e daxwazên xwe tînin ziman. AKP 16 salin li îktidardê ye. Çima heta niha ev daxwaza wan pêk neanî. Ger ku AKP samîmî bûya, dê statu nas kiribûya. Ez bawer nakim ku Erdogan samîmî be. Ez wekî welatiyekî elewî di bin zext û tundiyê de dijîm. HDP, dibêje em wekî heftrengê ne. Elewî jî rengek ji vî rengî ye. Ji ber vê yekê di nava HDP’ê de me. Bêyî HDP demokrasî jî nabe. Em bawer dikin ku kurd, elewî, jin ciwan bi HDP'ê bêtir aram bibin û bêhnê bistînin. Ji ber vê yekê çareserî HDP ye. Bêyî HDP'ê demokrasî û aramî pêş nakeve."  

 

Gerçek, destnîşan kir ku gel êdî ji derewên AKP'ê bêzar bûye û êdî roja 24'ê Hezîranê dê bibe roja hilweşîna saltanatê. 

 

MA / Melike Ceyhan