WAN - YSK'ê biryara da ku dê li navçeya Payîzava ya Wanê 27 sindoq bên veguhastin. Ev sindoqên ku dengên HDP'ê ji wan dertên, hin jê dê li gundên cerdevanan ên bi qereqolan dorpêçkirî û 40 kîlometre dûr bên danîn. Ji gundên ku dê sindoqên wê bên veguhastin yek jê jî Hindistan e. Şêniyên Hindistanê bertek nîşanî vê yekê dan û gotin: "Eger sindoqan bibin Stenbolê jî, em ê biçin û dengê xwe bidin."
Desteya Hilbijartinê ya Bilind (YSK), çend roj berê biryar da ku dê li 19 bajaran hin sindoq bên veguhastin. Hejmara hilbijêrên sindoqên ku bi hinceta "ewlehiyê" biryara veguhastina wan hat dayîn 144 hezar in. Ji van bajarên ku dê sindoqên wan bên veguhastin yek jê jî Wan e. Dê li navçeya Payîzava ya Wanê 27 hilbijartin bên veguhastin.
Li ser biryara YSK'ê dê sindoqên gundê Xirkanîs û Putê li gundê Bîhanîsê bên danîn; dê sindoqên gundê Hindistanê li gundê Arêxanê, dê sindoqên Şuşnemêrg û Şaxanê li gundê Şikaftkanê, dê sindoqên Tumanis, Başûn û Kangaverê li gundê Qesirkê; dê sindoqên Aşkan, Şivreş, Makuşk, Axçûrê li gundê Axşînê, dê sindoqên Zeynîs, Zêvkê li gundê Repetikê, dê sindoqên Derbadanîsê li gundê Şehmanisê; dê sindoqên Melkava, Qurtkanê li Kolanê; dê sindoqên Çarçela, Kalegirîn, Koxan, Dimirkus, Rîkavç, Babanîs, Mervana jî li gundê Dîmê bên danîn.
Hejmara hilbijêrên van sindoqên ku dê bên veguhastin 3 hezar û 562 ye. Li gorî hilbijartina berê HDP, ji van sindoqan di 12 heban de ji sedî 90 deng girtibûn. Di 10 sindoqan de jî ji sedî 80'ê û di 5'an de jî di ser ji sedî 60 re deng girtibûn.
DÊ JI BO DENGDAYÎNÊ 40 KÎLOMETRE BIÇIN
Ji gundên ku dê sindoqên wan bên veguhastin yek jê Tûmanîs e. 134 hilbijêrên Tûmanîsê hene û sindoqa vî gundî li gundê Qesrîkê hatiye danîn. Qesrîk 40 kîlometre dûrî Tûmanîsê ye. Her wiha sindoqa gundê Hindistanê jî li gundê Arêxanê hatiye danîn. Arêxan 5 kîlometreyan dûrî Hindistanê ye.
DÊ HDP BI MÎNÎBUSAN HILBIJÊRAN VEGUHÊZÎNE
Endamê Komîsyona Agahiyan a HDP'a Payîzavayê Fehîm Ozyaşar, diyar kir ku ew ê hilbijêran bi mînubusan veguhêzînin û dê li ser van sindoqên wan ên hatine veguhastin herî kêm du muşahid hebin.
Halîl Taşarê ji gundê Hindistanê ku sindoqa wan li gundê Arêxanê hatiye danîn, diyar kir ku ew ji dilê xwe ve emeliyat bûye lê ew ê bi vî halê xwe jî biçe dengê xwe bi kar bîne û got: "Em dengê xwe nadin kesî. Mirin jî têde be em ê dengê xwe bidin partiya xwe HDP'ê."
Hiratî Taşar got: "Dibin kuderê bila bibin, em ê dengê xwe bidin xwe. Serokê me û parlementerê me xistin girtîgehê. Gelek zilm li me kirin. Sindoqan bibin deverên 200-300 kîlometre dûr me jî, em ê biçin dengê xwe bidin. Ev hilbijartin ji bo me pir girîng e."
‘BILA HERKES BIÇE DENGÊ XWE BI KAR BÎNE'
Yavûz Yildiz jî got: "Eger sindoqan bibin Stenbolê jî, em ê biçin û dengê xwe bidin." Kerem Taşar jî, diyar kir ku tenê ew ê dengê xwe bi kar neyînin ew ê dengê xwe jî biparêzin û got: "Ji ber ku li wan gundan cerdevan hene, divê em xwedî li dengê xwe derkevin. Em ê sindoqên xwe teslîmî cerdevanan nekin. Divê herkes biçe û deng bide. Çiqas dûr dibe bila bibe. Ne pir e, bila rojek me jî efdayî hilbijartinê be."