NAVENDA NÛÇEYAN – Namzetên HDP’ê li gelek navendan xebatên hilbijartinên 24’ê Hezîranê birêve birin û rastî kelecan û germahiya gel hatin. Welatiyan behsa qirîza aborî kir û namzetan jî got ku ji bo AKP’ê têk biçe piştevaniyê xwestin.
EDENE
Yek ji bajarên ku herî zêde namzetên HDP’ê bi eleqeyeke mezin tên pêşwazîkirin Edene ye. Namzetên HDP’ê yên Edeneyê Tulay Hatîmogullari, Songul Aydin û Eser Çapar li navçeya Çukurova li taxan geriyan, li bazar û semtan esnafan ziyaret kirin. Sever Uzun, Edîp Çaçan, Denîz Varol jî li navçeya Seyhanê li taxan geriyan û esnafên bazaran ziyaret kirin û li gel wan sohbet kirin.
Di ziyaretan de welatî û esnafan têkildarî qirîza aborî gilî û gazinên xwe ji namzetên HDP’ê re anîn ziman û gotin ku êdî ew ji vê rewşê bêzar in. Namzetan jî got ku ji bo qirîza aborî ji holê rabe divê her kes dengê xwe bidin HDP’ê da ku AKP di 24’ê Hezîranê de têk biçe.
MÊRSÎN
Li Mêrsîn û navçeyên wê jî xebatên hilbijartinê dewam kirin. Namzetên HDP’ê yê Mêrsînê Ridvan Turan, Fatma Kurtulan û Attîla Guney jî li navçeyan geriyan û gel û saziyan ziyaret kirin. Namzetan da zanîn ku ew ê hewl bidin ku welat bînin halê ku her kes dikaribe bijî û behsa ewlhiya hilbijartinê û sindoqan kirin û banga xwedî derketina sindoqan kirin.
ANTALYA
Namzetên HDP’ê yên Antalyayê Kemal Bulbul û Meral Geylanî Guneş jî li taxa Teomanpaşa geriyan û esnafan ziyaret kirin. Namzetan li gilî û gazinên esnafan guhdar kirin. Esnafan got ku qirîza aborî ya xerab bandorek neyînî li ser wan dike.
RIHA
Namzetên HDP’ê yên Rihayê li navçeya Xelfetî ya Rihayê jî buroya hilbijartinê vekir. Namzet ji aliyê gel ve bi hezkirin û kelecanê ve hatin pêşwazîkirin. Di vekirina buroyê de namzetê HDP’ê Nîmettullah Erdogmuş di vekirina buroyê de axivî û got ku Xelfetî mozaîka gelan e û dê vê mozaîkê veguhezînin hemû Tirkiyeyê
DÎLOK
Namzetên HDP’ê yên Dîlokê Bêrîvan Ozpolat, Musa Aydin, Fatma Lebe û Migîn Ceylan jî li taxên navçeyên Şahînbey geriyan û xebatên xwe birêve birin. Namzet li esnaf û bazaran geriyan bi gel re sohbet kirin. Namzetan propaganda hilbijartinê kirin û belavok belav kirin. Zarok û ciwan ji bo bi namzetan re wêneyan bikişînin wekî ku ketin pêşbaziyê. Esnaf û gel eleqeyek mezin nîşanî namzetan dan û soza piştevaniya HDP’ê dan.