AMED - Rojnameya li ser înternetê weşanê dike "e-rojname" ya bi kurdî ye, dest bi weşanê kir.

 

Rojnameya  li ser înternetê weşanê dike e-rojname dest bi weşanê kir. Li Tirkiye berê gelek rojnameyên bi kurdî weşan dikirin hatin girtin. Ji ber ku herî dawî hemû çapxaneyan deriyê xwe li Rojnameya Welat girt, rojnameya dijîtal "e-rojname"  dest bi weşanê kir.  Rojnameya dijîtal ku li ser navnîşana  www.e-rojname.com dest bi weşanê kir, di roja yekemîn a weşana xwe de ji bo balê bikişîne ser zextên li ser kurdî bi manşeta "Kurdî sînoran nas nake" derket pêşberî xwînerên xwe. 

Ji bo ku hûn xwe bigihînin rojnameya dijîtal ku bi zaravayê Kirmançkî jî weşanê dike divê hûn bibin abonê.  Edîtorên rojnameyê jî di nivîs û nûçeyên ku weşandin  de diyar kirin ku li dijî zextên li ser kurdî ew ê kurdan bê rojname nehêlin û  banga abonetiya rojnameyê kirin. 

 

Nivîsa Edîtor wiha ye: 

 

Em hemû xwendevanên rojnameya dîjîtal a bi kurdî, e-rojnameyê silav dikin. Ji ber ku yekemîn rojnameya rojane ya dîjîtal amade dikin, em pir bi kelecan in. Rêwîtiya rojnamegeriya kurdî di 22’yê nîsana 1898’an de bi rojnameya Kurdistanê dest pê kir û ew meş 120 sal in berdewam e.

 

Heta niha di oxira ragihandina heqîqetê de gelek bedêl hatin dayîn û îro jî berdêl tên dayîn. Wekî rojnamegerên kurd peywira me ya sereke ew e ku em bi zimanê xwe rastiyan ji gelê xwe re ragihînin.

 

Rojnamegeriya kurdî ji ber şert û mercan derbasî qonaxeke nû bû. Ji ber zextên dewleta tirk îro li Tirkiyeyê çapxane rojnameyên kurdî çap nakin. Di serdema nû ya rojnamegeriya kurdî de dê rojnameyeke rengîntir were amadekirin û hemû rûpelên rojnameyê dê rengîn bibin. Wekî destpêk em ê 6 rûpelan çap bikin û armanc ew e ku em di rojên pêş de hejmara rûpelên rojnameyê zêde bikin.

 

Rojnamegeriya kurdî li derveyî sînorên Kurdistanê ango li sirgûniyê dest bi weşanê kir. Piştî salan rojnameya Azadiya Welat navenda xwe anî Kurdistanê û li vê derê bi qasî 15 salan weşana xwe domand. Heta niha rojnameyên kurdî tenê li Kurdistan û Tirkiyeyê dihatin belavkirin. Tê zanîn ka ew rojname tûşî çi zext û zordariyên mezin hatin.

 

Bi vê xebata nû em hemû sînoran ji holê radikin. Em ê xwe bigihînin xwînerên kurdî yên li çar parçeyên Kurdistanê. Êdî kurdîhezên li Başûr, Rojava û Rojhilat jî dikarin bi rehetî rojnameya rojane ya bi zimanê kurdî bixwînin. Bi vê xebatê her wiha em ê hewl bidin xwe bigihînin hemû deverên cîhanê yên ku kurd lê dijîn. Em di wê baweriyê de ne ku di vê rêwîtiya gerdûnî de kurd û hezkiriyên zimanê kurdî dê me bi tenê nehêlin. Em dixwazin li hemû deverên cîhanê kurd bi nivîs, nûçe û peydakirina aboneyan tev li xebata rojnameya dijîtal ‘e-rojname’yê bibin.

 

Em ji niha de dibêjin ku ev xebat dê bi piştgirî û hêza we xwendevanên kurdî pêş ve biçe û li ser lingan raweste.

 

Ji bo şopandin û xwendina nûçe û rûpelên e-rojnameyê, bibin endam û endaman peyda bikin!