ÊLIH – Li Êlihê vekirina buroyên hilbijartinê ya HDP’ê didome. HDP’ê duyem buroya hilbijartinê li taxa Cudî vekir. Girseyek qelebalix tev lê bû û tax bi berzkirina slogana “Bijî HDP” hejandin.
Rêxistina HDP’a Êlihê vekirina buroyên hilbijartinê dewam dike. HDP piştî buroya navendî ya li Êlihê buroya duyemîn li taxa Cudî ya Êlihê vekir. Rêveberên HDP’ê, DBP’ê, atkîvîstên TJA, bernamzetên HDP’ê yên Êlihê, Dayikên Aştiyê û bi sedan welatî tev li bernameya vekirina buroyê bûn. Piştî fitarê ji heft salî heta heftê salî herî kes herikî vekirina merasîma buroyê. Beriya vekirina buroyê welatiyan li ber def û zirnê govend gerand. Her kêliya ku çû qelebalixa girseyê zêde bû û bênavber sloganên “Bijî HDP”, “Bijî Serok Apo” û “Bê Serok jiyan nabe” berz kirin.
‘EM Ê TABELYA WAN LI PIŞTA WAN BIKIN Û BIŞÎNIN’
Ji bo kesên di têkoşîna azadî û demokrasiyê de jiyana xwe ji dest dan rêz girtin pêk hat. Beriya vekirina buroyê Hevseroka HDP’a Êlihê Bêrîvan Helen Işik axivî û got: “Ev hilbijartin a man û nemanê ye. Em ê li Êlihê wisa bikin ku partiyên din bikin rewşa partiyên tabela wan bimîne. Em ê herî dawî tabelayên wan li pişta wan bikin û wan ji vir bişînin. Ev hilbijartina hilweşandina rejîmê ye. Çimkî vî bajarî gelek caran dîrok nivîsandiye.”
Piştî axaftina Işik, Dayikên Aştiyê kurdeleya buroyê birî û vekirina buroyê pêk anîn.
‘EV HILBAJIRTIN FIRSEND E’
Piştî vekirina buroyê Dayika Aştiyê Meyase Akdag axivî û wiha got: “Ez li vir carek din bang li dayikên leşker û polîsan dikim; werin em dest bidin ev û aştiyê bînin. Ev hilbijartin ji bo we jî firsendek e. Werin em ji şer re bêjin na û bila hêsir nerijin û kes neyê kuştin.”
TAX HEJANDIN
Piştî axaftin û vekirina buroyê bi sedan welatî li qadê govend gerandin û dirûşm berz kirin. Dengê slogana “Bijî HDP” taxê hejand. Heta paşîvan gel li buroya hilbijartinê sekinî û hin welatiyan jî der barê pêvajoyê de nîqaş kir.
DENGBÊJAN BI KLAMÊN XWE PIŞTEVANÎ DA HDP’Ê
Li aliyê din HDP’ê plansaziya Buroya Navendî ya HDP’a Êlihê derxist û dê ji îro şûn ve her êvar piştî fitarê rêzeçalakiyan li dar bixe. Şahiya îşev bi klamên dengbêjan dest pê kir û bi sedan welatî tev li bernameyê bûn. Dengbêj Ehmedê Xî, Hozan Hadî, Dengbêj Mizaferê Celdekî û Dengbêj Mekiye bi dorê klamên xwe gotin. Balkêş bû ku dengbêjan di klamên xwe Rêberê PKK’ê Abdullah Ocalan, namzetê HDP’ê yê Serokomariyê Selahattîn Demîrtaş ji bîr nekirin û navê wan di klamên xwe de vegotin.