STENBOL – Zimanzan Necmiye Alpay diyar kir ku di vê hilbijartinê de peywîrek girîng dikeve ser hemû milên aligirên demokrasiyê û banga berpirsyariyê li her kesî kir. Hunermend Ferhat Tunç jî got: “Tekane nûneriya aştî, demokrasî, biratî û azadiyê HDP ye.”
Zimanzan Necmiye Alpay û hunermend Ferhat Tunç hilbijartina zordest a 24’ê Hezîranê nirxandin.
‘EM DI REWŞEK DIJ DEMOKRASIYÊ DE NE’
Necmiye Alpay bi bîr xist ku ji hevserokan bigire heta hezaran endamê HDP’ê di girtîgehan de ne û got: “HDP di bin zextên giran de ye. Dixwazin bi van zextan HDP’ê ji li dijî qanûnê bidin nîşandan. Dixwazin partiyek qanûnî derveyî xebatan partiyên siyasî bihêlin. Ev hemû bi destê dewletê pêk tê. Partiyên din ên siyasî newêrin bêjin ‘Ev jî partiyek wek me siyasî.’ Nikarin helwesta xwe deynin holê. Em di rewşek li derveyî demokrasiyê de derbas dibin.”
‘HDP POLÎTÎKAYEK RAST BIRÊVE DIBE’
Alpay da zanîn ku HDP a ku dengê 6 milyon hilbijêr girtiye û li derveyî tifaqê hiştin niha polîtîkayek rast birêve dibe û wiha got: “Başe ku HDP’ê biryarên mîna boykotê negirt. Dê bi hêza xwe ya cewherî bikeve hilbijartinê. Ev jî ji bo daxwaz û hêza xwe bide nîşandan firsendek dîrokî ye. Ji niha ve dek û dolabên hilbijartinê dest pê kirin e. Çunkî ji her alî ve zextan li ser HDP’ê didin meşandin. Li aliyê din jî gumanên ji bo ewlehiya hilbijartinê jî hene û dilê kesî nerehet e. Mirova nikare bêje baweriya kesî bi Desteya Bilind a Hilbijartinê t3e. Em di nav şertên dij demokratîk û zordest de diçin hilbijartinê. Ji ber ku hemû kesî kirine evdê xwe. Di vê pêvajoya hilbijartinê de peywîra girîng dikeve ser hemû alîgirên demokrasiyê. Divê hemû kes berpirsyarî hilde ser milê xwe û helwesta xwe li dijî neheqiyê deyne.”
Alpay got ku divê ji bo namzetê serokomariyê yê HDP’ê Selahattîn Demîrtaş bê berdan ji aliyê raya giştî ya demokratîk ve kampanyayek bi bandor bê destpêkirin û got: “Çunkî ev yek jî bo welat tişteka herî şerm e.”
‘HDP NÛNERTIYA GELAN E’
Hunermend Ferhat Tunç jî anî ziman ku ew jî bênavber xebatên hilbijartinê ya Demîrtaş û HDP’ê birêve dibe û got: “Her çiqas birêz Demîrtaş di girtîgehê de bihêlin jî lê dê xebata xwe birêve bibe. Lê ne pêkan e vîna wî dîl bigirin. Dibêjin hilbijartina zordest, lê ji bo ev hilbijartin veguhere serkeftinê di destên gelên Tirkiyeyê de ye. Tekane nûnertiya aştî, demokrasî, biratî û azadiyê ya li ser vê axê HDP ye. HDP li parlamentoyê vîna hemû netew û baweriyan temsîl dike. Divê hemû kesên bi wîjdan her yek wek Demîrtaş bixebite. Hemin Demîrtaş bernadin, divê her yek ji me bibe Demîrtaş û li qadan heta serkeftinê em bixebitin.”
MA / Muhammet Dogru