HATAY – Elewiyên ereb komkujiyên ku komên cîhadî li dijî gundiyên elewî pêk anîne ji bîr nekirine û ev tişt gotin: "Em baş dizanin ku dê demokrasî bi destê van çeteyan neyê Sûriyeyê."
Şerê 7 sal e li Sûriyeyê dewma dike, di warê civakî, siyasî û aborî de bandoreke xirab li ser gelê Hatayê kir. Civaka Hatayê bal kişand ser şerê li ber serê wan diqewime, diyar kirin ku ji şerekî navxweyî zêdetir, şerekî emperyalîzmê ye û bal kişandin ser têkiliyên xwe yên bi xizmên xwe yên aliyê sînorê Sûriyeyê.
Welatiyê elewiyê ereb yê li Taxa Tekebaşi ya navçeya Samandagê dijî, ji ber ewlehiyê nexwest navê xwe bêje, diyar kir ku li Rojhilata Navîn di bin navê "Bahara Ereban" de komkujiyeke mezin pêk anîne û ev tişt got: "Li Rojhilata Navîn şanoyeke bi xwîn hat pêşandan. Bayekî zehmet bû û herî dawî li Sûriyeyê da. Kesên êrîşê Sûriyeyê kirin, bi tevahî çeteyên El Qaîdeyê bûn. Ev pêvajo piştî çeteyên El Nusra, OSO û Ehrar û Şamê bi destê Amerîka û Îsraîlê hatin bi çekkirin, dest pê kir. Teşkîlatên îstixbaratê van çeteyan hêj bi rêve dibin."
‘GEL JI HEBÛNA VAN KOMAN ACIZ E’
Welatiyê elewî da zanîn ku gelê Hatayê bi gelê Sûriyeyê re xizmên hev in û wiha got: "Mînak piştî şerê li Sûriyeyê, elewiyên li herêma Lazkiye û Kasapê û elewiyên li herêma Samandagê ya Hatayê dijîn, wekî berê hev nabînin. Sînor hat girtin. Kmên ku dişibin El Qaîdeyê û bi wan re têkiliyên xwe heyî, tevahiya sînor xistin bin serweriya xwe. Çûyîn û hatina mirovên me yên li vir asteng kirin û têkiliyên me qut kirin. Gel ji hevûba van çeteyan gelekî aciz e."
‘ÇETE NIKARIN LI SÛRIYEYÊ DEMOKRASIYÊ AVA BIKIN’
Welatî da zanîn ku ev şerê heyî ji bo berjewendiyên hêzên emperyalîst e û dê ji bo welatên li Rojhilata Navîn demokrasiyê neyne û wiha axivî: "Em dizanin ku emperyalîzma Amerîkaya biçe ku dê demokrasiyê saz neke. Meseleya Sûriyeyê jî di bin navê 'Bihara Ereb' de şanoyek leyîstin û bi sed hezaran mirov qetil kirin. Gelê me yê li vir ji ber ku ev rewş dîtin, dizanin ku dê bi destê çeteyan li sûriyeyê demokrasî neyê avakirin." Welatî destnîşan kir ku ew OSO'yê wekî çete dibînin û wiha dirêjî da axaftina xwe: "Her çendî OSO, El Qaîde, El Nusra û Ehrar û Şam navê wan cuda be jî hişmendiya hemûyan jî heman tişt e."
'ELEWIYÊN EREB QETIL KIRIN'
Ciwanê 22 salî yê li Samandagê kafeyê dide xebatê, derbirî ku şerê li Sûriyeyê bû sedem ku gel bikevin nav lêpirsînê, ev lêpirsîn herî zêde di warê nasname û çandê de xwe daye nîşan û wiha pê de çû: "Li Sûriyeyê xizmên me hene û komên cihadî li dijî elewiyên ereb komkujî pêk anîn." Welatiyê ciwan bal kişand ser êrîşên Hêzên Çekdarên Tirk (TSK) û komên girêdayê wê jî anî ziman ku wer dixwiyê êrîşên Tirkiyeyê tu encam bi dest nexistiye.