Bi îlankirina Rewşa Awarte (OHAL) re, hikumetê pergala mulaqatê li ser hemû saziyên cemaweriyê ferz kir û beyî mulaqatê karmendan nagirin kar. Mahiyet û çarçoveya lêpirsîna "ewlehiyê" beyî ku guhertineke qanûnî pêk were, hat guhertin. Gelek kesên di saziyên cemaweriyê de mafê xebatê bi dest xistine, beyî ku der barê wan de hukmek hatibe birîn, ji ber hincetên lêpirsîna ewlehiyê nagirin kar. Li Amedê 96 bijîjk, li tevahiya Tirkiyeyê nêzî 600 bijîjk bi hincetên wiha dest bi kar nekirin. Bernamzetên bijîşkiyê yên fakulteya tibê qedandin û piştre ji bo dest bi kar bikin şertên pêwîst anîn cih, teblîxata ku Wezîrê Tenduristiyê ji wan re şand, ew matmayî hiştin.

 

DAXWAZÊN WAN RET KIRIN

 

Bijîşkên li bendê bûn dest bi kar bikin, ji wan re nivîsa "Veşarî" şandin û ev tişt gotin: "Li gorî encamên lêpirsîna KPSS'ê ya 2017/5'an a pozîsyona personelên bi peyman a bi cihkirinê, bi hejmara 657'an a Qanuna Memûrên Dewletê ya madeya 48'an a fikraya yekemîn a benda (A) yê, ji ber ku şetên we yên tayînkirinê nehatiye fêmkirin, tayîna we nehatiye kirin."

 

'EW JÎ NIZANIN ÇIMA NEHATINE TAYÎNKIRIN’ 

 

Parêzerê Sendîkaya Kekdarên Sîgorteyên Civakî û Tenduristiyê (SES) Erhan Urkut, diyar kir ku kesên ji lêpirsîna "Ewlehiyê" derbas nebûne, ji bo çi derbas nebûne haya wan jê tune û ev tişt got: "Ev kes çima negirtine kar haya wan jê tune. Der barê wan de biryara dadgehê an jî cezayekî ku hatiye birîn tune. Bijîşkên ku serî li me dan, der barê yek kesî de lêpirsînek nehatiye vekirin. Em difikirin ku lêpirsîna ewlehiyê ya der barê wan de, li ser hesabên wanên medyaya civakî, lêkolînên derûdorê yên civakî û dema xwendekariyê de li ber çavan hatine girtin. Lê tu biryara darazê di vir de tune û ev li hemberî kesê bibe bijîşk jî ne asteng e. Ji bo bibe asteng divê îdia bên lêpirsînkirin û divê dadgeh darizandinê bike."

 

'DIVÊ DOZ BÊ VEKIRIN'

 

Urkut, diyar kir ku divê xebatkarên tenduristiyê yên tayîna wan nehatine kirin serî li darazê bidin û wiha pê de çû: "Di vê mijarê de gelek dozê ku me vekirin hene. Em bawer dikin em ê van dozan qezenc bikin. Hin heval ji biryarê re itiraz kirin, ev ne pêwîst e. Hevalên ku teblîgat girtin, divê di nava 60 rojî de serî li Dadgeha Îdarî bidin û dozê vekin. An dê mafê xwe winda bikin."

 

Urkut destnîşan kir ku roja OHAL îlankirine heta niha, lêpirsînên "ewlehiyê" bi vî şeklî tên rêvebirin û wiha got: "Bi KHK'ê re, kesên di çavê desthilatdariyê de wekî 'kesê bi fikar' tê dîtin, di bin navê 'lêpirsîna ewlehiyê' de sererastkirinek pêk anîn. Beyî ku hincetekê jî bidin nîşan bi yek peyvê pêşî li memûrbûna mirovan digirin. Ev bê hiqûqiyek cidî ye. Em hêvî dikin ku rayedarên hikumetê demek ji ya din zûtir vê bê hiqûqiyê bi dawî bike."

 

MA / Rifat Şahîn