ŞIRNEX – Komira bê qalîte ya ku Wezareta Çavkaniyên Tabî û Enerjiyê bi qaçaxî derdixe û bi buhayekê erzan difroşe fîrmayên nêzî hikumetê, di pêşengiya Weqfa Alîkarî û Civakî de li welatiyên Şirnexê belav kir.
Weqfa Piştgirî û Alîkariya Civakî ya Waliyê Şirnexê (SYDV), rojên borî komira zivistanê li welatiyan belav kir. Komira ku rêjeya kukurtê zêde ye û kaloriya wê kêm e, dibe sedema qirêjiya hewayê. Komir li navenda navçeyê tê belavkirin.
KOMIRA ALÎKARIYÊ JI OCAXÊN 'QAÇAX' DERDIXIN
Komira ku bi gotinên wekî "Em ê malbatên mihtac bê şewat nehêlin" propagandaya wê hat kirin, ji kontarê Çiyayê Cûdî bi qaçaxî tê derxistin. Heta niha di kanên komirê de gelek karkeran jiyana xwe ji dest da. Rojên borî dîsa hezaz pêk hatibû 8 karkeran jiyana xwe ji dest dabûn. Piştî mirinên karkeran, Wezareta Çavkaniyên Tabî û Enerjiyê ev kana komirê wekî "qaçax" pênase kiribû. Ev kanên qaçaxî teslîmê Acar Groupê kirin û xwediyê wê jî Mehmet Emîn Acar e û Acar wekî kesekî nêzê hikumetê tê zanîn.
50 TL’YÎ DISTÎNIN, DIDIN 450 TL’YÎ
Acar Group hemû kanên komirê yên herêmê xistiye bin tekela xwe, bi rêya fîrmayên taşeronî li gorî kalîteya wan ji hev cuda dike û tona wan di navbera 50 û 80 TL'yî de difroşe. Ev komira bi sedan metre di binê erdê de di şert û mercên gelek zehmet de tê derxistin. Gelek karker mirinê didin ber çavê xwe û dikevin van kanên komirê, bi tevir û bêran komirê derdixin. Komira ku tê derxistin bi rêya fîrmayên taşeron û girêdayê Dem û Dezgeya Komira Tirkiyeyê (TKÎ) yê bi fermî difroşin.
Ev komira carnan li nêzî qenterên TKÎ'yê, carnan jî li noqteyen di navbera Cizîr û Şirnexê de pakêt dikin, dîsa bi rêya fîrmayên taşeronî li bajarên cuda li gorî kalîteya wan bi 250-450 TL’yî difroşin.
KOMIRA HERÎ BÊ KALÎTE DIDIN SYDV’Ê
Komira ku qala wê tê kirin beşeke wê herêmeke bajaroka Qesrîkê tê komkirin, piştî li vir tûrikên komiran tên tijekirin, bi buhayekî zêde difroşin Weqfa Piştgirî û Alîkariya Civakî. Komira ku kalîteya wê kêm e, buhayê wê tê veşartin û piştre teslîmê SYDV'ê dikin û li bajar û navçeyan ev komir tê belavkirin.