Komek endamên Meclîsa Ciwanên Tebqa û Jinên Ciwan ên bajarê Tebqayê bi aramanca piştgirtiyê bidin gelê Efrînê li bajaroka EL-Rimêla ya girêdayî bajarê Tebqa ya Bakurê Sûriyê meşiyan. Di meşê de wêneyên Endama YPJ'ê Avesta Xabûr, ala Yekîtiya Ciwanên Ereb ên Demokratîk, Meclîsa Jinê Sûriyê, Rêveberiya Xweseriya Demokratîk a herêma Tebqa, Meclîsa Sûriya Demokratîk û pankartên “Bi rihê ciwanan em ê dijmin ji herêmê derxînin", "Em hemû Efrîn in" û "Efrîn li ber xwe dide” hatin hildan.

 

Meşvanan di meşê de şaxê zeytûnan rakirin û bi yek dengî gotin "Efrîn ne bi tenê ye", "Bijî Berxwedana Efrînê" û "Bi can bi xwîn bi te re ne Efrîn."

 

Êrîşa TSK'e û komên girêdayi wê li ser Efrinê di 20’ê Çileyê de dest pê kir û 25 rojin didome. Di êrîşên TSK'ê yên hewayî û bejayî de heta niha zêdetirî 180 welatiyên sivîl jiyana xwe ji dest dan. Zêdetirî 400 welatî jî birîndar bûn. Bi dehan şênî û zarokên gundê Ebû Redanî jî tevlî meşa ji bo piştgirtiya Efrînê bûn û berxwedana Serdemê silav kirin.