Şandeya parlemanterên Başûrê Kurdistanê ku şevê din gihîşt Efrînê îro civîneke çapemeniyê lidar xist. Endam û nûnerên parlemanterên Partî Demokratî Kurdistan, Yekîtî Niştimanî Kurdistan, Yekîtî Îslamî, Tevgera Goran û Partiya Komînîst di heyetê de cih girtin. Heyet ji aliyê girseyeke mezin a Efrînê ve hatin pêşwazî kirin. Heyetê îro li ber Navenda Xweseriya Demokratîk a Kantona Efrînê bi civîna çapemeniyê bername û armanca xwe ya ji serdana Efrînê eşkere kirin. Heyetê berxwedana gelê Efrînê silav kir. Gelek rojnamegerên çapemeniya herêmê û çîhanê beşdarî civînê bûn û civîn şopandin. Di civîna çapemeniyê de rojnamegeran têkildarî serdanê pirs ji parlementerên Başûr kirin. Şandeya Başûr di civîna çapemeniyê de îşaret girîngiya yekîtiya netewî ya Kurd. Heyetê piştgiriya xwe da Efrînê û berxwedana gelê Efrîn û şervanan ya li dijî dagirkeriyê slav kirin. Heyetê wiha got: “Wê dagirkerên Kurdistanê têk biçin.”

 

Di civînê de hevserokên Meclîsa Rêveber Hêvî Mistefa û Osman Şêx Îsa, hevseroka Partiya Yekîtiya Demokratîk Eyşe Hiso, Hevserokê Meclîsa Zagonsaz Mihemed Seîd Yûsif, Hevserokê Meclîsa Kantona Efrînê Mistefa Hesen, Hevseroka Tevgera Civaka Demokratîk (TEV-DEM) Daliya Henan, Serokê Desteya Karûbarên Derve Silêman Cafer û bi dehan rojnamevan beşdar bûn.

 

Di destpêka civînê de Hevseroka Meclîsa Rêveber a kantona Efrînê Hêvî Mistefa bixêrhatina şandeya parlemanê kir û got ku berxwedana Efrînê dîroka herêmê dinivîse û hemû welatiyên herêmê bi lehengî li hemberî hovîtiya artêşa dagirker a Tirkiyeyê li ber xwe dide.

 

Hêvî di axaftina xwe de got ku serdana parlemanterên Başûrê Kurdistanê ya Efrînê ji giştî cîhanê re hate piştrastkirin ku Efrînê ne bi tenê ye û hemû gelên azadîxwaz piştgiriya Efrînê dikin û wiha anî ziman: “Bingeha hêz û îradeya me berxwedana welatiyan û alîkariya wan bi şervanan re ye.”

 

Piştre parlemanteran diyar kirin ku welatiyên Efrînê ji giştî cîhanê re îspat kirin ku berxwedana wan ji hemû aliyên dijmin xurttir e û berxwedana serdemê ya Efrînê buha nirxandin û gotin ku serkeftina berxwedana Efrînê serkeftina her çar parçeyên Kurdistanê ye.

 

Şandeyê destnîşan kir ku di vê dema niha de pêwîstî bi xurtkirina hevgirtina aliyên Kurdî heye da ku bi hemû derfetên xwe yên madî û manewî alîkariya berxwedanê bikin û nakokiyên xwe yên siyasî bidin aliyekî û dane xuyakirin ku ew weke parlemanter bi temamî amade ne alîkariya welatiyên Efrînê bikinn û ambargoya li ser wê bişkînin.

 

Şandeyê bêdengiya civaka navnetewî li hemberî destdirêjiya li dijî Efrînê şermezar kir.

 

Piştre parlemanteran pirsên rojnamevanan bersivandin. Di nava bersivan de parlemanteran diyar kirin ku piştgiriya wan bi berxwedana Efîrnê re ne tenê siyasî û manewî ye lê belê dê bi hemû hêza xwe hewl bidin ambargoya li ser Efrînê bişkînin û dê civaka navnetewî agahdar bikin da ku zextê li hikûmeta Tirkiyeyê bikin û van êrîşên hovane li dijî herêmê rawestînin.

 

Li ser pirsa ku balyozkarê Tirk li Hewlêrê hişyarî daye parlmanê eger piştgiriya berxwedana Efrînê bike, parlemanteran diyar kirin ku parlemana Başûrê Kurdistanê saziyeke serbixwe ye û nûnertiya hemû pêkhateyên Başûrê Kurdistanê dike û hemû xebatên wan li gorî qanûnên parlemana Kurdistanê ya sala 2005’an e û alîkariya bi kantonên Rojava û Bakurê Sûriyeyê re erka wan e. Parlemanteran her wiha destdirêjiyên artêşa dagirker a Tirkiyeyê li dijî welatiyên sivîl şermezar kirin û diyar kirin ku Tirkiye hemû pîvanên navnetewî û qanûnên mafên mirovan binpê dike.