Beriya Kongreya Asayî ya Mezin a 3'yemîn a HDP'ê ku dê di 11'ê Sibatê de li Enqereyê pêk bê, gelek nûnerên partiyên siyasî û saziyên pêkhateyên HDP'ê ne hatin binçavkirin. Bi biryara Serdozgeriya Komarê ya Enqereyê Hevberdevkê Kongreya Demokratîk a Gelan (HDK) Prof. Dr. Onûr Hamzaoglû, Hevberdevka Platforma Piştevaniyê ya Sosyalîst (SODAP) Kezban Konûkçû, Hevberdevkên Partiya Keskan û Pêşeroja Çepgir Nacî Sonmez û Eylem Tûncaelî, Wekîla Serokê Giştî yê Partiya Sosyalîst a Bindestan (ESP) Fadîme Çelebî û Hevserokê Giştî yê Partiya Ji Nû Ve Rizgarî ya Sosyalîst (SYKP) Ahmet Kaya li Stenbolê hatin binçavkirin. Her wiha li Îzmîrê jî polîsan avêt ser mala Hevberdevka HDK'ê Gulîstan Kiliç Koçyîgît û der barê Hevseroka Giştî ya HDP'ê Serpîl Kemalbay de jî biryara binçavkirinê hat dayîn. Nûnerên partiyên siyasî bertek nîşanî van binçavkirinan dan. 

 

‘WÊ MIROV WÊ EYWANÊ TIJE BIKIN'

 

Parlementerê HDP'ê yê Stenbolê Erdal Ataş, diyar kir ku armanca van binçavkirinan astengkirina kesên ku dê di kongreyê de peywirdar bin û ev tişt gotin: "A rast du sê gav hene. Ya yekemîn astengkirina girseyê ye. Çimkî hatina bi deh hezaran mirovî ji bo me meseleya herî girîng e. Îktîdar dibêje 'Êdî ev tune ne, qediyan'. Lê bi deh hezaran mirovî bersivdayîna vê fîkriyata îktîdarê wan nerihet dike. Otobêsên hatine amadekirin, pankartên hatine çêkirin dibînin. Wê ev kongre hem polîtîkaya şerî ya binketî, krîza aborî û hem jî rasteqîniya vî welatê ku veguherandine girtîgeheke vekirî teşhîr bike. Ji ber vê dixwazin girseyê asteng bikin." 

 

Ataş, bi lêv kir ku sedemeke din a van binçavkirinan jî astengkirina kesên ku dê di HDP'ê de cih bigirin û domand: "Dixwazin delegeyan û kesên ku dê bibin endamê PM'ê yan jî wê di vê çarçoveyê de tev bigerin asteng bikin. Niha jî li hemberî Hevberdevkên HDK'a ku bi awayekî siyasî HDP'ê temsîl dike operasyona hatin lidarxistin. Em li benda vana bûn. Ji ber vê em jî li benda hemû gel, hêzên demokrasiyê, xwazî bila HDP'yî bin an nebin, em li benda hemû mirovên aştîxwaz in û li dijî şer in ku tev li kongreyê bibin." Ataş got li dijî van operasyonan qethiyen ew qadên têkoşîn naterikînin û li gel her tiştî jî wê wê mirov bên û wê eywanê tije bikin.

 

'WÊ BI SER NEKEVIN'

 

Rêveberê SYKP'ê yê Stenbolê Mehmet Kesîm jî, destnîşan kir ku bi girtin û binçavkirinên bi şerê ku ji roja ku rewşa Awarte hatiye îlankirin bênavber didome pêk tên, hedefa wan tenê bêdengkirina muxalefetê ye. Kesîm bi lêv kir ku bi vî awayî tê xwestin ku kirasekî sazîbûyînê li faşîzmê bê kirin û serketina dîktatoriya faşîst bê îlankirin. Kesîm got bi binçavkirina kesên ji HDP, HDK û tevgerînên sosyalîst wê hedefa ku faşîzmê diyar kiriye nikaribe îlan bike. Kesîm diyar kir ku bi hezaran endamên HDP'ê di girtîgehê de ne, lê belê dîsa jî her roj xwe nû dike û riya xwe didomîne û got: "HDK jî di pêvajoyeke zînde de ye. Hemû tevgerînên sosyalîst, hêzên demokratîk li riya têkoşîna bi hev re digerin û dibînin. Wê ev têkoşîn bidome. Wê kongreya HDP'ê jî peyamekê bide van pêkanînan û hemû cîhanê. Em li ser piya ne, em ê bitêkoşin û em ê têkoşîna xwe xurtir bikin. Em bi vê baweriyê fealiyetên xwe didomînin." 

 

Endamê Desteya Rêvebir a HDK'ê Metîn Kayaoglû jî desnîşan kir ku îktîdara AKP'ê ji bo xwe welatekî bêmahnî, pak dixwaze û got: "Em li vî welatî tekane derdorên ku li dijî îktîdarê muxalfetê dikin. Helbet kongreya HDP'ê ya ku dê roja yekşemê bê lidarxistin ji bo ji derheqê van pirsgirêkan derkeve liv û tevgerînek e. Îktîdar dixwaze kongreya ku dê bibe cihê hêviyê asteng dike. Armanca îktîdarê ya çend rojan ev e." Kayaoglû bi lêv kir ku AKP qîma xwe bi vê yekê tenê nayîne û domand: "Îktîdara Qesrê dixwaze baxçeyekî bê dirî biafirîne. Baş dizane ku li Meclîsê HDP û li Tirkiyeyê jî HDK tevgerîneke demokratîk e û di warê teoriyê de zexm e. Hemû hewldanên wê ew e ku vê tevgerê asteng bike." Kayaoglû ku got "Li Efrînê, li kurdistanê, li Stenbolê, li Îzmîrê perçeyeke HDP û HDK'ê heye" ew ne muxalefeteke ku îktîdara siyasî karibe wan biqedîne. Kayaoglû got: "Divê hem muhatabên me hem jî dostên me vê yekê zanibin."