STENBOL – Hevberdevkê HDP’ê Prof. Onur Hamzaoglu beriya bê binçavkirin operasyonên li dijî HDP’ê û HDK’ê nirxand û got: “Ev mudaxele motivasyona me zêde dike.” Hevberdevka HDK’ê Gulîstan Kiliç Koçyigît a der barê wê de biryara binçavkirinê derket jî got: “Ev operasyonên tên kirin dê xebatên HDK’ê paş de nede.”
Beriya Kongreya Mezin a 3’yemîn a Asayî ya Partiya Demokratîk a Gelan (HDP) li Stenbol û Îzmîrê bi ser gelek malên endam û rêveberên HDP’ê û HDK’ê de hat girtin. Di çarçoveya vê operasyonê de li Stenbolê 31 kes û li Îzmîrê jî 42 kes hatin binçavkirin. Di der barê bi dehan kes de jî biryara binçavkirinê heye. Hevberdevkên Kongreya Demokratîk a Gelen (HDK) Prof. Dr. Onur Hamzaoglu û Gulîstan Kiliç Koçyigît pêla binçavkirinên li dijî HDP û HDK’ê nirxandin.
HAMZAOGLU: EV OPERASYON MOTÎVASYONA ME XÛRT DIKIN
Hevberdevk Hamzaoglu beriya îro bê binçavkirin der barê operasyonan de ji Ajansa Mezopotamyayê (MA) re nirxand. Hamzaoglu destnîşan kir ku li gel hemû tengkirin, zext û tundiya li ser HDP’ê jî di asta partiya pêşeng a Tirkiyeyê de ye û got: “Operasyonên li dijî HDP û HDK’ê yên beriya 11’ê sibatê pêk tên ne tesadufî ne. Ne mimkûn e naverokê vala bikin. Dixwazin ku kongre bi hejmarek qels bê lidarixistin. Berpirsyariya me ya HDK’ê heye ku em destekê bidin HDP’ê. Bêyî ku xebatên me bên astengkirin, em ê li ser piya bin. Ev mudaxeleyên li dijî partiyên me tenê motîvasyonê dide me. Em ê bi vê motîvasyonê biçin kongreyê.”
‘DIXWAZIN GEL JI PARTIYÊ BITIRSE’
Polîsan îro bi ser mala Hevberdevka HDK’ê Gulîstan Kiliç Koçyigît a li Menemena Îzmîrê de girt û der barê wê de biryara binçavkirinê ku derxist jî ji Ajansa Mezopotamyayê re axivî. Koçyigît diyar kir ku ji ber xebat3en HDP’ê û HDK’ê bêtir hedef tê girtin û wiha got: “Dixwazin tenê civakek yek dengî biafirînin. Armanca hikumetê ew e ku HDP’ê krîmînalîze bike û ji hev de bixîne. Em dîroka Tirkiyeyê wek dîroka girtina partiyan binav dikin. Bêyî ku partiyê bigirin, xebatkar, parlamenter û rêveberan diavêjin zîndanan. Nêzîkatiyek ku bila êdî HDP nikaribe bixebite xistine hişê xwe. Her wiha em li Meclîsê jî dibînin ku wekîliya parlamenterên HDP’ê dixînin. Dixwazin HDP’ê ji Meclîsê tasfiye bikin. HDP’ê tînin asta partiya ku nikaribe bixebite. Bi van binçavkirin, girtin û zextan dixwazin gel û civakê ji HDP’ê dûr bixin û çavê gel bitirsînin.”
‘EM KEFÎLÊ HEVALÊN XWE NE’
Koçyigît da zanîn ku li gel hemû polîtîkayên tunekirinê jî gel xwedî li partiya xwe derdikeve û got: “Ji heybetiya 11’ê sibatê ditirsin. Naxwazin ku gel xwedî li kongreya 11’ê sibatê derbikeve. Hemû hevalên me ji bo temînkirina aştî, azadî, demokrasî û aramiyê dixebitin. Em kefîlê hevalên xwe ne. Ev operasyonên têgihiştinê dê nikaribin xebatên HDK bi paş de bixin.”
MA / Necla Demîr - Bîlal Seçkîn