STENBOL - Di çalakiya Dayikên Şemiyê ya hefteya 1066'emîn de daxwazên xwe yên têkildarî pêvajoyê anîn ziman û diyar kirin ku aştî ne tenê bidawîkirina şer û pevçûnan bi ronîkirina paşerojê pêkan e.
Dayikên Şemiyê ku her hefte li Qada Galatasarayê kom dibin û aqûbeta xizmên xwe yên di binçavan de hatin windakirin û qetilkirin bipirsin û ji bo kiryar bên darizandin edaletê bixwazin çalakiya xwe ya 1066 'emîn li dar xistin. Dayikên Şemiyê li Qada Galatasarayê kom bûn, bi qurnefîl û wêneyên xizmên xwe yên di binçavan de hatin windakirin hilgirtin û bi boneya 30'ê Tebaxê Roja Windayan a Navneteweyî de careke din aqûbeta windayên xwe pirs kirin.
Li ser navê girseyê Sebla Arcan daxuyanî xwend û diyar kir ku di sala 2010’an de ji aliyê Neteweyên Yekbûyî ve 30’ê Tebaxê wekî Roja Windayan a Navneteweyî hatiye îlankirin û wiha axivî: “30'ê Tebaxê ne tenê êşên berê tîne bîra me, di heman demê de armanc dike ku ji bo pêşî li binpêkirinên bi heman rengî yên di dema pêş de bigire. Em dizanin, ev hatiye serê me: Revandin û wendakirin ne tenê jiyana kesên windabûyî, di heman demê de jiyana hezkiriyên xwe jî parçe dike. Xizmên windayan nediyariyê re rûbirû tên hiştin. Ev nediyarî êşa herî mezin a hemûyan e. Aqûbeta windayan di nava tarîtiyê de tê hiştin, parastina kiryaran dibe sedem ku birîn neyên pêçandin. Veşartina rastiyê, li ser bîra kolektîf şopên kûr dihele û travmaya navbera nifşan mayinde dike.”
‘JI BO AŞTIYEKE BI RÛMET Û MAYÎNDE’
Sebla Arcan bal kişand ku daxwaza heqîqet û edaletê ji bo aştiya demokratîk şertekî bingehîn e û wiha got: "Ji ber vê yekê, daxwaza malbatên windayan a naskirina rastiyan, ne tenê xwegihandina hezkiriyên xwe, di heman demê de ji bo her kesî bi rêya heqîqetê rê li ber aştiyeke bi rûmet û mayînde veke. Ji ber ku aştiyeke mayînde ancax bi naskirin û pêçandina birînan pêkan e. Derxistina rastiyan êşa malbatan û hesta bêbaweriyê ya di civakê de baş dike. Çanda bêcezahiştinê dişkîne û civakê îqna dike ku tevlî pêvajoyên avakirina aştiyê bibe. Me diyar kir, em ê bi dewamî bêjin: Mayîndebûna aştiyê ne tenê bi qedandina pevçûnan, bi tenê bi ronîkirina paşerojê re pêkan e."
DAXWAZÊN DAYIKÊN AŞTIYÊ
Sebla Arcan daxwazên Dayikên Şemiyê wiha birêz kir;
“* Bila cihên windayên me bên aşkerakirin, gorên wan bên dîtin û heqîqet bê aşkerakirin.
* Bila kiryar û berpirsyar bên darizandin û bêcezahiştin bi dawî bibe, edalet pêk were.
* Dewlet bi paşerojê re rûbirû bibe, hesab were dayîn.
* Ji bo careke din windakirin pêk neyên qanûn bên derxistin û mekanîzmayên bi bandor bên avakirin.”
Sebla Arcan da zanîn ku di daxwazên xwe bi israr in û bi silavkirina çalakiya xizmên windayan a 700’emîn ya li Êlihê ve gotina xwe bi dawî kir.
Çalakî li Qada Galatasarayê bi danîna qûrnefîlan bi dawî bû.