AMED - Ji bo meşa ku dê di 1'ê Îlonê de li Amed'ê bi dirûşmeya "Ji bo avakirina civaka demokratik em ber bi aştiyê ve dimeşin" were lidarxistin, banga beşdariyê hat kirin. 

 

Amadekariyên meşa ku dê di 1'ê Îlonê Roja Aştiyê ya Cîhanê de, bi pêşengiya Platforma Ked û Demokrasiyê ya Amedê û Platforma Saziyên Demokratîk were lidarxistin, didomin. Meşa ku dê bi dirûşmeya "Ji bo avakirina civaka demokratik em ber bi aştiyê ve dimeşin" bê lidarxistin, dê di 1'ê Îlonê de li ji ber Girtîgeha Amedê heya ber AZC Plaza ya li semta Ofîsê ve bidome.

 

BANGAWAZÎ

 

Komîteya amadekar a meşê, Partiya Wekhevî û Demokrasiyê ya Gelan (DEM Partî) a Amedê daxuyaniyek da. Hevserokê DEM Partiyê yê Amedê Abbas Şahîn diyar kir ku di pêvajoyeke nû de ne. Şahîn girîngiya meşa ku dê di 1'ê Îlonê de were lidarxistin destnîşan kir û got: "Em gelê xwe vedixwînin meşa ku dê ji bo çareseriya demokratîk a pirsgirêka kurd û avakirina komareke demokratîk were lidarxistin." 

 

Ji Tevgera Jinên Azad (TJA) Bahar Pekerê jî diyar kir ku divê têkoşîna ji bo aştiyeke mayînde were bilindkirin û her kesî vexwand meşa ku dê bê lidarxistin.