ENQERE- DEM Partiyê ragihand ku ew ê 1'ê Îlonê Roja Aştiyê ya Cîhanê li gelek bajaran bi girseyî pîroz bikin û bi ruhê Cejna Nevrozê bang li gel kir ku dakevin qadan.

 

Partiya Wekhevî û Demokrasiyê ya Gelan (DEM Partî) dê ji bo pîrozkirina 1'ê Îlonê Roja Aştiyê ya Cîhanê li gelek bajaran çalakiyên cûrbicûr li dar bixe. Cîgirê Hevserokatiya Giştî ya DEM Partiyê Mahfuz Guleryuz, der barê girîngiya Roja Aştiyê ya Cîhanê û çalakiyên ku partî dê li dar bixe de agahî dan.

 

Guleryuz destnîşan kir ku ew ê 1'ê Îlonê ya îsal bi "ruhê Newrozê" pêşwazî bikin û got ku ew ê hewldanên xwe yên ji bo civakîkirina aştiyê bidomînin. Guleryuz ragihand ku ew ê li Stenbol, Riha, Mêrdîn û Amedê çalakiyên girseyî li dar bixin û ew ê 1'ê Îlonê Roja Aştiyê ya Cîhanê bi girseyî li seranserê Tirkiyeyê, li kêleka hêzên ked û demokrasiyê pîroz bikin. Guleryuz diyar kir ku ew ê di 1'ê Îlonê de bi awayê herî xurt li qadan bin û ew ê di tevahiya Îlon û Cotmehê de hewldanên xwe yên bi mijara aştiyê bidomînin.

 

‘BI RUHÊ NEWROZÊ BER BI QADAN VE'

 

Guleryuz got: "Divê em vê pêvajoyê bi ruhê Cejna Newrozê pêşwazî bikin. Çawa ku em her sal di Newrozê de hemû nerazîbûn, hêvî û daxwazên xwe ji cîhanê re radigihînin, divê em hêviya xwe ya ji bo aştiyê, daxwaza xwe ya ji bo aştiyê, israra xwe ya ji bo aştiyê û helwesta xwe ya li ser vê di 1'ê Îlonê bi zelalî diyar bikin. Ger em vê bikin, em ê dengê xwe bi hêz bigihînin rayedarên pêwîst."

 

BERNAMEYA 1'Ê ÎLONÊ

 

Guleryuz çalakiyên ku dê Hevserokên Giştî Tulay Hatîmogullari û Tuncer Bakirhan beşdar bibin wiha rêz kir:

 

* Tulay Hatimogullari dê di 31'ê Tebaxê de beşdarî mitînga Stenbolê bibe.

 

* Tuncer Bakırhan dê di 31'ê Tebaxê de beşdarî mîtînga li Rihayê bibe.

 

* Tulay Hatimoğulları dê di 31'ê Tebaxê de beşdarî çalakiya "Şahiya Aştiyê ji bo Gelan û Baweriyan" bibe. 

 

* Tuncer Bakırhan dê di 1'ê Îlonê de li Amedê beşdsarî meşê bibe.