Yek ji bajarên ku li dijî îtîfaqa AKP-MHP’ê bi hêz xûya dike Îdir e. HDP’ê piştî ku namzetên hevşaredariyên xwe eşkere kir Namzetên Hevşaredariya HDP’ê yên Îdirê Eylem Çelîk û Yaşar Akkuş ji aliyê Îdiriyan ve bi germahî û kêfxweşî hatin pêşwazîkirin û dest bi xebatên xwe kirin. Mirov dikare bêje ku HDP’ê encama hilbijartina 31’ê Adarê eşkere kiriye jî. Namzetên Hevşaredariyê Eylem Çelîk û Yaşar Akkuş bal kişandin ser eleqeya azerî û terekemeyiyan a li hember partiya wan û gotin: “Em bi bawerin dê partiya me HDP bi serkeftinek xûrt bi ser bikeve.” 

 

'GEL BI HEMBÊZEK KELECANÎ ME PÊŞWAZÎ KIR’ 

 

Nazmeta Hevşaredariyê Eylem Çelîk a Terekemeyî diyar kir ku çavê hemû siyasetê li ser wan e û wiha got: “Li vî bajarî tirk, kurd, terekeme û gelek netew dijîn. Me di vê pêşwazîkirina xwe de dît ku gel bi ruhê biratiya gelan me pêşwazî dike. Vê pêşwazîkirina bi germahî me gelek bextewar kir. Mirov dikare bêje bi hembêzek kelecanî me pêşwazî kirin. Vê xwedî derketina wan rûmetê da me. Vê tabloya pêşwazîkirinê da nîşandan ku em ê di hilbijartinê de bi ser bikevin. Gelên li vir bi polîtîkayên HDP’ê yên tevahî bi salan e şaredarî li vir tê birêvebirin. Li Îdirê di vê hilbijartinê de jî teqez dê netew bi ser bikevin. HDP partiyek siyastek wekheviya jinê, azadî, biratî û her mirov xwe di hundirê wê de dibîne ye. Ez wej jinek terekeme bang li hemû gelan dikim bila werin deriyê HDP’ê ji her kesî re vekiriye û bila werin em hemû bi hev re bajarê xwe birêve bibin.” 

 

 

'WÊ GELÊN ME BI BIHAREK HDP’YÎ ŞIYAR BIBE’ 

 

Çelîk da zanîn ku ew ê teqez bi ser bikevin û wiha dewam kir: “Piştî em bi ser bikevin di kîjan warî de xizmet ji gel re lazim be em ê wê çareser bikin. Em ê qet û qet tu kesî cuda nebînin û ji her kesî re heman xizmetê bikin. Karê me yê esil dê piştî hilbijartinê dest pê bike. Çimkî em ê roja ewil ji bo gelên xwe dest bi xizmetê bikin. Gelên me wê bi sibehek biharê ya ku dê HDP bi ser ketibe û ew ê xwe bi xwe birêve bibin şiyar bibe.” 

 

'EM BIKIN ŞAREDARIYA GELAN’ 

 

Namzetê Hevşaredariyê Yaşar Akkuş jî destnîşan kir ku ew ê her tim layîqî gelên xwe bibin û wiha got: “Tevî hemû polîtîkayên zext û tirsandinê jî gelê me bi kelecanek germ me pêşwazî kir. Ev yek di heman demê de hêrsa wan a li dijî desthilatdariyê dide nîşandan. Pêşwazîkirina me bersivek xûrt li dijî rejîma yek zilamî bû. Di vê yekê de tê xûyakirin ku wê gelê me di 31’ê Adarê de carek din tercîha li HDP bide nîşandan. Ev deh sal in HDP li Îdirê xizmeta gel dike. Ev gelek girîng e. Çimkî ev deh sal e HDP bêyî cudakariya zimanan, netewan, çandan û baweriyan bike xizmetê dike. Em ê xebatek û xizmetek ku bibe layîqî hemû çand û netewan birêve bibin. Em ê li dijî hemû dek û dolabên wan bi hêza xwe îradeya xwe deynin holê. Em ê mal bi mal û kolan bi kolan bigerin û bi gelên xwe re bên gel hev.” 

 

'EM Ê BIRATIYÊ ESAS BIGIRIN’ 

 

Akkuş anî ziman ku ji ber bajêrê wan di sêgoşeya sê welatan de cih digire xwedî girîngiyek stratejîk e û got: “Ev der cihek ku li gorî paradîgmaya biratiyê ya HDP’ê ye. Em ê xebatek û xizmetek ku biratiyê esas bigire birêve bibin. Em ê tekakesiyê red bikin û şaredariyek xizmeta civakî û gelan birêve bibin. Em ê şaredariyak jinan, ekolojiyê û civakê esas digire birêve bibin. Gelên me şaredariyek samîmî ji me dixwaze û em ê vê daxwaza wan bînin cih. Em ê şaredariyek li gorî pêdiviyên gel û pirsgirêkên wan çareser bike bidin xebitandin.” 

 

'DÊ BI SIBEHA BIRATIYA GELAN ŞIYAR BIBIN’ 

 

Akkuş gotina “Xwe gihandin sînorê Ermenîstanê jî” ya Cemîl Çîçek a 10 sal berê û gotina “pirsgirêka bekayê” ya Meral Akşener a çend roj berê bi bîr xist û wiha got: “Tevî hemû bêtehamuliya Cemîl Çîçek û yên mîna wî ev 10 sal in me xwe gihandiye sînor. Heke li vî bajarî gelên me beşdarî mitinga me dibin û qadê tije dikin û li derdora partiya me dibin xelek ji xizmeta şaredariya me memnûn in. Heke ku azerî û terekeme ji kurdan bêtir xwedî li HDP’ê derdikevin, wê dem ev tê wê maneyê ku em bi serketine e jî. Rast e îro Cemîl Çîçek nîne lê belê em hene û li vir in. Tevî hemû xêrnexwazan û gotinên reşkirina partiya me jî wê li vir gel bi ser bikevin. Gelên Îdirê dê sibeha 1’ê Nîsanê bi ruhê biratiya gelan ku bi serketiye ji xewê şiyar bibe.” 

 

MA / Adnan Bîlen