AMED - Dadgeha Qanûna Bingehîn (AYM), ji bo biryarên Dadgeha Ewlehiya Dewletê (DGM) ya ceza li kesan birîye birarek mînak da. AYM'ê biryar da ku yên ji aliyê DGM'ê ve hatine cezakirin, ji nûve dikarin bên darizandin.
Nivîskar û bijîşk Abdullah Altun ê di sala 1999'an de li Dadgeha Ewlehiya Dewletê (DGM) ya hêjmar 3 hat darizandin û rastî cezayê muebetê hat, bi sedema ku darizandinke serbixwe û bê alî nehatiye kirin, serî li Dadgeha Mafên Mirovan a Ewropa (DMME) da. DMME di 19'ê Cotmeha 2006'an de biryar da û diyar kir ku darizandina serbixwe û bê alî hatiye îhlalkirin û xwest ji nûve bê darizandin.
DADGEHÊ DAXWAZA JI NÛVE DARIZANDINÊ RED KIRIBÛ
Abdullah Altun, piştî biryara DMME'ê xwest ji nûve bê darizandin û di 10'ê Tîrmeha 2013'an de serî li 6’emin Dadgeha Cezayên Giran a Amedê da. Altun xwest ji nûve bê darizandin û cezayê li wî hatiye birîn li ber çavan bê derbaskirin. Lê 6'emîn Dadgeha Cezayên Giran a Amedê bi hinceta "Biryara DMME'ê der barê usûlê de ye" û daxwaza darizandinê red kir. Altun, destnîşan kir ku di 15'ê Hazirana 2012'an de biryarên venêrtina Konseya Wezîran a Konseya Ewropa heye û li 4’emîn Dadgeha Cezayên Giran a Amedê îtîraz kir. Lê dadgehê di 21'e sibata 2014'an de îtîraz jî red kir.
AYM'Ê 4 SAL ŞÛNDE BERSÎV DA
Abdullah Altun, di 4'ê Adara 2014'an de bi sedema ku biryara DMME'ê hatiye îhlalkirin û mafê wî yê darizandina ji nûve ji destê wî hatiye girtin serî li AYM'ê da. Dadgeha Qanûna Bingehîn (AYM) pişti 4 sal şûnde bersîv da. AYM'ê bal kişand ser biryara DMME'ê ya xala 6'an û Peymana Mafên Mirovan a Ewropa (PMME) ya xala 311'an a hêjmar 5271'an û destnîşan kir ku mafê darizandinê hatiye îhlalkirin. AYM'ê ji bo ji nûve bê darizandin agahî ji Wezareta Dadê xwest. Wezaretê bal kişand biryara DMME'ê û PMME'ê û destnîşan kir ku li gorî xala 6’an û xwest ev xisûs li ber çavan bê girtin û xwest AYM biryarê bide. AYM'e piştî biryara Wezareta Dadê biryar da ku Altun ê ji aliyê DGM'ê ve hatiye cezakirin ji nûve bê darizandin û li gorî wê cezayê wî bê diyarkirin.
AYM'ê da zanîn ku îhlal li gorî xala 50'î ya hêjmar 6216'an a AYM'ê pêk hatiye û jibo îhlal ji hole rabe divê ji nûve biryar bê dayîn. AYM'ê xwest ji bo Altun serbixwe û bê alî bê darizandin li gorî xala 36’emîn a AYM'ê li dadgehek serbixwe û bê alî bê darizandin. AYM biryar da ku dosyayê bişînin 6’emîn Dadgeha Cezayên Giran a Amedê û ji nûve bê darizandin. Pişti AYM’ê di 17'ê Tîrmeha 2018'an de biryar da ku Altun li 6’emin Dadgeha Cezayên Giran a Amedê be darizandin, li bendê ye ku Dadgeh biryarekê bide.
MA / Aydin Atay