EDENE - Dê danişîna doza şewata li wargeha xwendekaran a li Aladagê di 17'ê Çileya 2019'an de pêk bê. Parêzerê malbatên mexdûr Omer Çelîk, destnîşan kir ku hêviya wan ji darizandineke duserî tune ye.
Li Aladaga Edeneyê, agir bi wargeheke xwendekarên zarok ketibû. Di şewatê de 11 jê zarok 12 kes miribûn û 22 xwendekar jî birîndar bibûn. Ji ber ku qeymeqamê berê yê Aladagê îtiraz li dosyeyê kir û daxwaza yekkirina dosyeyê hat redkirin, dîroka danişîna dozê diyar bû. Di danişîna 7'ê Îlonê de Dadgeha Cezayê Giran a Kozanê midûrê wargehê Alî Genç, Serokê Komeleya Alîkariya Xwendekaran Îsmaîl Ûgûr hatibûn berdan. Lê belê ji ber hat xwestin li qeymeqamê berê yê Aladagê Ahmet Ziya Fîlîzer ê ji ber FETO'yê hat îxrackirin, bi tawanbariya "peywira xwe baş bi cih neaniye" 3 sal ceza bê birîn, Dadgeha Cezayê Giran a 1'ê ya Edeneyê biryara yekkirina dosyeyê dabû.
Lê Daîreya Cezaya ya 3'yan a Edeneyê dosye lêkolîn kir û biryara yekkirinê red kir û dosye ji Dadgeha Cezayê Giran a Kozanê re şand. Dê danişîna dozê di 17'ê Çileya 2019'an de li Dadgeha Cezayê Giran a Kozanê pêk bê.
Parêzerê malbatên mexdûr Omer Çelîk, doza didome nirxand.
Çelîk, destnîşan kir ku ji ber hemû bersûcên dozê hatine berdan, bertek nîşan dane. Çelîk, diyar kir ku ev yek raya giştî nerihet kiriye û got: "Bi berdana bersûcan careke din derket holê ku li welatê me cemaet çawa tên parastin. Bi vê yekê baweriya ji bo edaletê ji holê rabûye."
‘BI HILWEŞÎNA AVAHIYÊ DELÎL HATIN WINDAKIRIN'
Çelîk, bilêv kir ku raporên pêzaniyê yên di dosyeyê de sedema bûyerê û berpirsiyariya kiryaran derdixîne holê. Çelîk, diyar kir ku bi rûxandina avahiyê ne dadgeh ne jî pêzan nikaribûne li cihê bûyerê lêkolînê bikin. Çelîk got: "Bi vê yekê delîl hatin windakirin. Dê bi delîlên heyî ku raporên pêzaniyê li gor wan hatine amadekirin berpirsiyar baş neyên tespîtkirin. Em ê îtiraz li rapora pêzaniyê bikin."
‘HÊVÎ JI DARAZEKE DUSERÎ TUNE YE'
Çelîk got: "Di darizandineke ku bûyer û mexdûr heman tişt û kes in, darizandineke ku bi gelek tawanbariyan pêk bê dê ji bo edaletê xizmetê bike. Lê belê qeymeqamê wê demê bi hinceta îhmalkirina peywirê li Dadgeha Cezayê Giran a 1'ê ya Edeneyê tê darizandin. Lê kesên kiryariya qeymeqam ew mexdûr kirine jî muwekîlên me ne. Em parêzerên muwekîlan jî diyar dikin ku divê qeymeqam jî tevî 18 bersûcên din li heman dadgehê bê darizandin. Lê di vê rewşê de ev ne pêkan e. Wê edaleteke duserî xizmeta edaletê neke. Hêviya me ji vê yekê tune ye."
Çelîk, anî ziman ku ew ê heta dawiyê dozê bişopînin û ji bo xwedîderketina li dozê bang li herkesî kir.
MA/ Hamdullah Kesen