EDENE - Temel Bagdû, birayê belavkarê rojnameyê Kadrî Bagdû, diyar kir ku di navbera wan û DAIŞ'iyan de tu pirsgirêk tune ne û ew û wan li heman taxê esnaftî kiriye û got: "Nexwe têkilya wan û dewletê bi hev re heye ku, bûyer nayê çareserkirin."
Servet Koçê DAIŞ'î di vîdeoyekê de behsa kuştina belavkarê rojnameyê Kadrî Bagdû kiribû. Di vê vîdeoyê de hatibû gotin ku Temel bagdû, birayê Kadrî Bagdû, jî di lîsteya wan û kuştinê de bû. Temel Bagdû, ji Ajansa Mezopotamyayê (MA) re behsa tîmê înfazê yê DAIŞ'ê kir. Bagdû, anî ziman ku ew û Ercan û Talîp Guler û Servet Koç ên DAIŞ'î li heman taxê rûdiniştin û esnaftî dikirin. Bagdû, anî ziman ku li hember qehwexaneya wan market û dikana qesabiyê ya Gulerê DAIŞ'î wan hebûye.
‘GELEK KES DIHATIN'
Bagdû, anî ziman ku Koçê DAIŞ'ê zavê malbata Guler e û got: "Servet Koç ji Kibrisê hat Edeneyê û li cem Talîp û Ercan Guler ma. di navbera me û wan de tu hisûmet tune ye. Em û wan rûdiniştin û me bi hev re xwarin jî dixwar. Jixwe kargeha wan jî li hemberî qehwexaneyê bû. Nedihatin qehwexaaneyaa me, lê me tim çay ji kargeha wan re dişand. Ji ber esnaftiyê têkiliya me bi hev re hebû. Me nizanibû ew DAIŞ'î ne. Heta ku kekê min nehatibû kuştin jî me nizanibû. Jixwe ev kes nediçûn xutbê jî. Min çend caran ji wan pirsî, ji bo çi naçin xutbê. Ji min re gotin 'Nimêja pişt vî meleyî qebûl nabe. Em bi xwe dikin.' Pir mirov diçûn dikana wan. Pir biyanî jî diçûn. Lê me nizanibû ew çi kes in. Di van dikanan de civîn çêdikirin, lê me nizanibû ka ji bo çi dikin."
'XWESTIN MALBATA ME TUNE BIKIN'
Bagdû, anî ziman ku malbata Guler di salên 90'î de hatine Kolana Ova ya Taxa Şakirpaşayê û got: "Ev ji Bedlîsê ne. Dijminatiya me û wan tune ye. Lê di dema bûyerên Kobaniyê de dema kekê min hat kuştin em pê hesiyan em dijminê hev in." Bagdû got: "Evana xwestin malbata me tune bikin. Ji ber ku kekê min rojnamevanê kurd bû. Ji ber kekê min û ji ber kesên partiyê (BDP) dihatin vir navê min jî xistine lîsteyê. Bi salan e li vir esnaftiyê dikim. Kekê min jî bi salan rojnamevanê kurd bû. Loma em hedef hatin girtin û biryara înfazkirina me hat girtin."
Bagdû, anî ziman roja ku kekê wî hatiye kuştin wî li buriya cinayetê ya nexweşxaneyê îfade daye û got: "Buroya cinayetê der barê kuştina kekê min Kadrî Bagdû de lêpirsîn da destpêkirin. Min û polîsekî ji Bedlîsê li kamerayên dikanên li taxê nêrîn, lê me tiştek nedît. Polîs ji min re got 'ger me dîmen bidîtana jî dê li emniyetê bihatana windakirin.' Me û parêzerên me çend caran me xwest doz bê kirin û kujer bên darizandin, lê nebû. Em ê dev ji vê dozê bernedin. Ger dewlet bixwaze vê bûyerê çareser bike, dikare bike. Ji 2014'an ve em li ber xwe didin. Lê dewlet naxwaze çareser bike."
‘BILA KUJER BÊN DÎTIN'
Bagdû, destnîşan kir ku ji ber Koçê DAIŞ'ê wi warê wijdanî de nerihet bûye û hatiye "xapandin" di sala 2016'an de ji biraziyê wî Ferhat Bagdû re nivîsandiye û li xwe mikur hatiye. Bagdû, anî ziman ku li gor gotinên Koçê DAIŞ'Ê pêşî kuştina kekê wî nehatiye qebûlkirin, lê paşê bi fermana Bariş Tekçe yê DAIŞ'ê hatiye kirin. Bagdû, anî ziman ku tevî hemû mikruhatinên Koç ê DAIŞ'î û delîlan, dîsa jî kujerên keskê wî nehatine darizandin û got: "Ji van DAIŞ'iyan hin jê hîn jî bi rihetî digerin. Nexwe têkilya wan û dewletê bi hev re heye ku, bûyer nayê çareserkirin. Kujer nayên dîtin û darizandin. Em dixwazin kujer bên dîtin û darizandin."
MA / Hamdullah Kesen