ŞIRNEX – Li Gundê Çemê Hêstira yê Bajaroka Sêgirkê ya Şirnexê esker û cerdevanan li ser Kokel Babat ê şivan gule reşandin û bi giranî birîndar kirin. Piştî bûyerê Ajansa Anadolu (AA) wekî "PKK’yî" serwîs kir. Kekê Kokel Babat, Tamer Babat bertek nîşanî AA'yê da û diyar kir ku birayê wî şivan bû û bê çek bû.
Li Gundê Çemê Hêstira yê Bajaroka Sêgirgê ya Navçeya Qilebana Şirnexê di 23'ê Cotmehê de esker û cerdevanên derketin operasyonê li ser şivan Kokel Babat ê 38 salî ku bavê 3 zarokan e gule reşandin. Kokel Babat ê bi giranî birîndar bû rakirin Nexweşxaneya Dewletê ya Şirnexê. Kokel Babat niha li beşa lênerîna zêde ya nexweşxaneyê tê girtin. Destûr nadin ku malbat û parêzerên Babat biçin nexweşxaneyê û wî ziyaret bikin. Heta niha rayedarên ferMî jî der barê rewşa Babat de daxuyaniyek fermî nedan. Lê Ajansa Anadolu (AA) beriya ku rayedarên fermî daxuyaniyekê bide û biçe lêkolîn bike Babat wekî “PKK’yî nîşan da û nûçe weşand. AA. di nûçeyê de diyar kir ku Babat ê birîndar bûye ew kesê ku sala par cerdevan Mehmet Paksoy kuştiye ye. AA. dîsa îdîa kir û got "Dema Babat direviya gule berdanê û birîndar kir."
DIZANIN GUNDÎ YE
Keke Kokel Babat Tamer Babat, bertek nişanî nûçeya AA. da û wiha got: "Her kes dizane birayê min şivan û gundî ye. Zewicî ye û bavê 3 zarokan e. Birayê min 15 - 20 kilometre dûrî gund ji aliyê cerdevan û eskeran ve rastî êrîşê hat. Li herêma ku birayê min rastî êrîşê hat telefon nakişînin. Piştî esker û cerdevanan gule berdan birayê min, em agahdar nekirin. Ji me re gotin hatiye kuştin. Ger ku em bi gazî û hawara wî neçûna dê ew jî tev li kuştiyê kujer nediyar bikirana. Her kes dizane gundî ye û ji gund e. Bavê 3 zarokan bû û bê çek bû. Birayê min şivan bû. Biraye min nemir niha giranî birîndar e. Kurê min ê şivan ew dît. Dema kurê min ew dît gule li pişta wî ketibû û xwîn winda dikir. Piştî kurê min agahî da me, em li beşa lezgîn 112'an geriyan û me xwest ambulansê bişînin. Ambulans rêya 30 deqîqeyî 3 saetan dereng hat. Em Saet di 14.00'an de li Ambulansê geriyan. Ambulans piştî 5 kilometre nêzî me dibe, li me digerin û dibêjin 'Çima birîndar bûye? Piştî ambulans gihişt cem me saet bûbû 17.00. Esker u cerdevan hatin mala me. Me got çima ambulans nedane. Gotin bi zorê destûr dan ku ambulans derbas bibe. Ji bo bê sewk kirin me xwest ambulansa helikopter bişînin. Lê nedan. Li ser vê yekê me xwest bi ambulansê bînin Nexweşxaneya Şirnexê. Vê carê xwestin bi lez neçin. Maşîna eskerî ket pêşiya ambulansê û yek jî ket pişt. Destûr nedan ku ambulans maşîna leşkerî derbas bike. Ez li fermandar geriyam. Min got ev ne edalet e. Min got birayê min xwîn wina dkike. Lê heta ketina Şirnexê destûr nedan. Destûr nedan ku ambulans di lembaya sor de derbas bibe. Rawestandin û xwestin di rêde bimire. Lê nemir. Ji ber ku em li xwe îxanetê nakin vê yekê bi serê me de tîne.
Bi salan e em di bin van zextan de dijîn. Em dixwazin ev zext bi dawî bibin. Ambulans a her kesî ye. Kî dibe bila bile divê ji bo her kesan wek hev tev bigerin.
Piştî gule berdan birayê min Fermandarê Kolordiya Asayişê ya Cendirmeyan a Wanê, Fermandarê Tumenê yê Şirnexê, Fermandarê Alayê yê Cendirmeyan a Bajarê Şirnexê, Sercerdevanên Sêgirkê û Hîlale yên AKP'i li hev kom bûn. Hatin cerdevan pîroz kirin. Şahiyek pêk anîn û 30 hezar tl xelat dan wî. Dema min pirsî çima ew qas were dane cerdevanan gotin 'Ji ber ku li Kokel dane. Şaredar ji bo xizmeta gel bikin hene. Ne ji bo cerdevanan pîroz bikin. Karê wan ne ewe ku cerdevanên mirovan bikujin pîroz bike. Dema bira bira dikuje divê wan pîroz nekin. Ev çawa biratî ye. Ev ne şarê şaredaran e."
MA / Ahmet Kanbal