ENQERE - Endama Platforma Hawirdorê ya Artvînê Sabriye Tûncay, bilêv kir ku li Artvînê çawa ji bo rantê û madenan xweza hat qetilkirin û koçberî hat ferzkirin, ya li Dersimê tê kirin jî heman tişte e.
Endama Platforma Hawirdorê ya Artvînê Sabriye Tûncay, şewitandina daristanên li Dersimê nirxand. Tûncay got: "Bi ya min armanc, dixwazin Dersimê ji mirovan xalî bikin. Ev yek berê li Artvînê jî pêk anîn. Geliyê Cerattepeyê bi temamî ji mirovan xalî kirin. Sedemên wê yên cuda hene. Îhtimal e li çiyayên Dersimê jî hin madenên em nizanin hene û bi vî awayî wê texrîb dikin."
‘ARMANC RANT E'
Tûncay destnîşan kir ku sedema van şewatan rant e û got: "An jê wekî ew dibêjin, bi gotina wan 'ji bo çend talankeran' wê derê naşewitînin. Li paş vê rant heye. Duh li Artvînê çi hatibe kirin, niha heman tişt li Dersimê tê kirin. Ji bo bala raya giştî bikeve ser vê ne hêsan e, me ancax di 5 salan de bala raya giştî kişand ser vê."
Tûncay, diyar kir ku şewitandina xwezaya Dersimê sûc e û bi vê re tevî koçkirina mirovan, giyanewerên li xwezayê jî tên tunekirin. Tûncay, anî ziman ku ew Platforma Hawirdorê ya Artvînê tenê ne li Dersimê, li kuderê xweza bê qetilkirin ew ê li wir bitêkoşin. Tûncay, destnîşan kir ku kapîtalîzm êdî emrê xwe xelas kiriye û ji ber vê pir hov bûye û nha jî li Dersimê ev pergal bi awayekî hovane êrîş dike.
Tûncay, bilêv kir ku divê hemû mirovahî li dijî pêkanînên li Dersimê derkevin û got: "Ev yek qetilkirina xwezayê ye. Nikarim li wan wêneyan binerim. Ev çi wijdan e, tevî daran ew heywanên biçûk bi saxî dişewitin. Bawer bikin ji mirovahiya xwe şerm dikim. Mirov çawa vê dike. Tim diçim Dersimê û têm. Di her şewatê de dilê min dişewite. Ji ber gora xwarziyê min Ozguç Yalçin jî li Xozatê ye, di her şewatê de dibêjim gelo dê agir bigihîje gora wî jî. Cihê şewitî pir nêzî Xozatê ye û ji ber dar li dor gora xwarziyê min hene, pirçûnek bi canê min dikevin."
‘EV PERGAL PERGALA ZILM Û TALANÊ YE'
Tûncay, bertek nîşanî polîtîkayên li Dersimê pêk tên jî da û destnîşan kir ku tiştên tên kirin eleqeya wan bi kesan tune ye û got: "Ev pergal pergala talan û zilmê ye. Ên di hikûmetê de biçin hin kesên din tên û heman tiştî dikin. Ez bûm 70 salî, min gelek darbe dîtin. Min tim got dê sibe xweştir bibe. Di salên 1970'î de di civînekê de min ji serokwezîrê wê çaxê Suleyman Demîrel re got 'Hûn ne serokwezîrê min in, min we nehilbijartiye.' Lê niha em xweziya xwe bi Demîrel tînin. Wê çaxê derdor evqas nedihat şewitandin û rûxandin. Niha ez xweziya xwe pê jî tînim."
‘MIN JI DAXUYANIYA WALÎ ŞERM KIR'
Tûncay ji bo daxuyaniya walî ku der barê şewatê de dabû jî got: "A rast walî fikrên xwe nabêje. Çi jê re gotibin ew jî wê dibêje. Fermanên hatine dayîn bi cih tîne. Waliyên tên tayînkirin ji kerema xwe bila baş bin. Bila terhê jiyana wî bajarî baş lêkolîn bikin. Bila bibin waliyên gel. Bi rastî jî min ji daxuyaniya wî şerm kir."
MA / Berivan Altan