Piştî "Banga Aştî û Civaka Demokratîk" a Rêberê Gelê Kurd Abdullah Ocalan, Platforma Saziyên Demokratîk di çarçoveya "Civînên Civaka Demokratîk" de gelek çalakî li dar xistin. Heta niha li Tirkiye û Kurdistanê zêdetirî 2 hezar civînên bi vî rengî hatine lidarxistin û di çarçoveya çalakiyên berdewam de, Platforma Saziyên Demokratîk dê li 13 bajaran mihrîcan, mitîng û meşan li dar bixe. Platforma Saziyên Demokratîk dê bernameya xwe ya "Mihrîcana Aştî û Civaka Demokratîk" li dar bixe ku li Cîzîrê dest pê kir û li Dep û Tetwanê berdewam kir. Dê li 13 navendên din, bi giranî li Amed, Wan û Samsûrê, li dar bixe.

 

Narîn Gezgor, Cîgira Hevseroka Partiya Herêmên Demokratîk (DBP), ku pêkhateyeke Platforma Saziyên Demokratîk e, der barê çalakiyên heyî û yên gengaz de agahî parve kirin. Narîn Gezgorê destnîşan kir ku wan li Kurdistan û Tirkiyeyê zêdetirî 2 hezar civîn li dar xistine û ev civîn berdewam dikin. Narîn Gezgorê destnîşan kir ku jinên ku pêşengiya pêvajoyê dikin eleqeyek û beşdarbûneke xurt nîşanî civînan dane. Narîn Gezgorê diyar kir ku nirxandinên Rêberê Gelê Kurd Abdullah Ocalan ên li ser jinan, nêzîkatiya wî ya ji bo jinan û hebûna wî di paradîgmayeke ku jinan dihewîne de, bû sedema ku jin zêde daxil bibin. 

 

 

Narîn Gezgorê diyar kir ku banga Abdullah Ocalan li ser jin û ciwanan bûye û got: "Ji ber vê yekê avakirin û civakîbûna vê pêvajoyê, her wiha beşdariya jinan di civînan de pir bi hêz bû. Jin di asteke wisa de bûn ku wan bi îradeya aştî û çareseriyê ya ku ji hêla Rêberê Gelê Kurd ve hatiye pêşkêşkirin kirin xwedî li pêvajoyê derdiekevin." 

 

LI 15 BAJARAN KARGEHÊN ÎDEOLOJIYA RIZGARIYA JINÊ

 

Narîn Gezgorê destnîşan kir ku piştî banga Abdullah Ocalan, Meclîsa Jinan a DBP'ê li gelek bajaran civînên jinan bi balkişandina ser îdeolojiya rizgariya jinan li dar xistiye û got: "Me atolyeyên jinan li dar xistin. Me li 15 bajaran 50 atolye li dar xistin. Em bi hezaran jinan re di van atolyeyan de hatin cem hev. Me van atolyeyan bi hişmendiya ku jin hêza bingehîn a avakirina aştiyê ne û rizgariya civakê bi rêgeza azadiya jinan dikare pêk were, li dar xistin. Me van hewldanan bi hişmendiya ku belavkirina îdeolojiya rizgariya jinê û civakîkirina perspektîfa birêz Ocalan, di rastiyê de, yek ji hîmên civakeke demokratîk e, dest pê kir û xebata me berdewam dike."

 

Narîn Gezgorê diyar kir ku ew ê xebatên xwe yên di vî warî de bidomînin. 

 

DI CIVÎNAN DE GEL ŞAHÎ Û MITÎNG XWESTIN

 

Narîn Gezgorê destnîşan kir ki avakirina civakeke demokratîk hemû beşên civakê, tevî hêza siyasî, femînîst û sosyalîstan, digire nav xwe û got: "Lê girîng e ku hemû dînamîkên civakê xwe wekî avaker bibînin. Ji ber vê yekê, wekî Platforma Saziyên Demokratîk, me civîn plan kirin da ku bangewaziyê û avakirina civakeke demokratîk bi vê hişmendiyê eşkere bikin. Vê bangewaziyê bi xwe coşeke mezin çêkir. Di civînan de, mirovan bi daxwazên meş û pîrozbahiyan ji bo silavkirina vê bangewaziyê û îradeya civakeke demokratîk serî li me dan. Ji bo vê armancê, me biryar da ku li 17 navendan meş û pîrozbahiyên girseyî li dar bixin. Me kampanyaya xwe li Cîzîrê da destpêkirin. Em ê çalakiyên xwe li gelek bajaran, di nav de Semsûr, Agirî, Bedlîs û Çewlîg, li dar bixin."

 

Narîn Gezgorö diyar kir ku Banga Aştî û Civaka Demokratîk bangek e ku ne tenê ji bo gelê kurd, lê ji bo gelên Tirkiyeyê, di nav de jin, ciwan û bindestan, avakirina jiyaneke demokratîk dihewîne. Narin Gezgorê got: "Di vê çarçoveyê de, em hemû beşên civakê, di nav de jin û ciwan, vedixwînin ku beşdarî meş û şahiyên me bibin ku em ê li hemû bajarên Kurdistan û Tirkiyeyê li dar bixin û pêvajoya nû û civaka demokratîk a ku em hewl didin bi awayê herî xurt ava bikin, silav bikin."

 

LI 13 NAVENDAN ÇALAKÎ

 

Narîn Gezgorê diyar kir ku mihrîcan û meşên ku li Cizîr, Dep û Tetwanê li dar xistine wê di 6'ê Tebaxê de li Bazîdê berdewam bikin; 9’ê Tebaxê li Semsûr, Çewlîg, Wêranşar û Sêrtê; 10’ê Tebaxê li Qoser, Edene; 11’ê Tebaxê li Mûşê; 12’ê Tebaxê li Gever, Îdîr; 13’ê Tebaxê li Êlih, Mêrsîn; û di 14'ê Tebaxê de li Amedê. Narîn Gezgorê ev agahî parve kir ku dê di 23'yê Tebaxê de li Wanê mitîngê pêk bînin.

 

MA / Mujdat Can