AMED - Cîgirê Serokê Komeleya Şêx Seîd Ramazan Ari, bal kişand ser şerên li Rojhilata Navînê û diyar kir ku Tirkiye neçar e bi kurdan re aştiyê bike û xwest ku polîtîkayên 100 salî yên îmha, înkar û asîmîlasyonê yên ku bi Şêx Seîd û hevalên wî dest pê kirine, bi dawî bibin. 

 

Di çarçoveya Pêvajoya Aştî û Civaka Demokratîk de ku ji aliyê Rêberê Gelê Kurd Abdullah Ocalan ve hat destpêkirin, Koma Aştî û Civaka Demokratîk a ji 30 kesan pêkhatî, di 11'ê Tîrmehê de li herêma Şikefta Casenê ya Silêmaniyê ya Herêma Kurdistan a Federe, bi merasîmekê çekên xwe şewitandin. Gelek nûnerên rêxistinên civaka sivîl, parêzvanên mafên mirovan, rojnamevan û siyasetmedar beşdarî merasîmê bûn.

 

Cîgirê Serokê Lijneya Rêveber a Komeleya Perwerde, Çand û Hevgirtinê ya Şêx Seîd RAmazan Ari ku di nav kesên ku merasîm temaşe dikirin de bû, ji Ajansa Mezopotamyayê re li ser merasîmê û çalakiyên piştî wê axivî.

 

HÊZA OCALAN

 

Arî ku got wan bi kelecaneke mezin merasîm temaşe kiriye, bal kişand ser atmosfera hestiyar. Ari destnîşan kir ku dema gerîla ji derenceyan daketin kes nikarîbû hestên xwe kontrol bike û got: "Atmosfereke pir hestiyar çêbû. Wan daxuyaniyên xwe dan û çûn. Pêvajo gihîştibû xalekê; me hêza birêz Ocalan dizanibû û me ew careke din di merasîmê de dît. Em spasiya her yek ji wan dikin ku pêşengiya pêvajoyê dikin."

 

YEKÎTÎ

 

Ari diyar kir ku merasîmê yekîtiya kurdan jî xurt kiriye û got: "Em ji yekîtiya di navbera kurdan de pir kêfxweş bûn. Beşek ji damezrandin û armanca komeleya me xurtkirina yekîtî û hevgirtinê ye. Me di merasîmê de ew atmosfer dît. Kurd yek û yekgirtî bûn."

 

Ari bal kişand ser pêwîstiya guhertinên destura bingehîn ji bo vê pêvajoyê û got: "Gava lezgîn a ku divê were avêtin guhertina destura bingehîn e. Divê meclis demildest bicive û guhertinên destûrî pêk bîne. Kesên ku çekên xwe danîn, li gorî Destûra Bingehîn a heyî nikarin werin Tirkiyeyê. Divê kes kesî nexapîne. Divê hemû maf û daxwazên kurdan demildest bi destura bingehîn werin misogerkirin." 

 

Arî diyar kir ku ew amade ne ku di çarçoveya pêvajoyê de wekî komele berpirsiyariyên xwe bicîh bînin û got: "Wekî komele, em dikarin bibin danûstandinkar. Em her gav amade ne ku berpirsiyariya yekîtî, biratî, aştî û edaletê bigirin ser xwe. Ev pêvajo pêvajoyeke 100 salî ye ku bi Şêx Seîd û hevalên wî dest pê kiriye û gihîştiye roja îro. Em amade ne ku her tişta ji destê me were bikin da ku îmhakirina sedsalî bi dawî bibe." 

 

MA / Fethî Balaman