XARPÊT - Rêxistinên mafên mirovan û baro bertek nîşanî îşkenceya gardiyanên li Girtîgeha Hejmar 2 a Xarpêtê ya li girtî Omer Cûma Salih kirin, dan û xwestin ku der barê berpirsan de lêpirsîna were vekirin.
Bi pêşengiya MED TUHAD-FED, Şaxa OHD’ê ya Amedê û Baroya Amedê, der barê îşkenceya gardiyanana a li girtî Omer Cûma Salih de li ber girtîgehê daxuyanî dan çapemeniyê û li dijî van binpêkirinên mafên mirovan xwestin tedbîr werin girtin. Hevserokê Kongreya Civaka Demokratîk (KCD) Berdan Ozturk, gelek partî û nûnerên rêxistinên civaka sivîl û gel beşdarî daxuyaniyê bûn.
TUNDIYA FIZÎKÎ Û GEFXWARIN
Endama Komîsyona Girtîgehan a Şaxa Komeleya Hiqûqnasên Ji Bo Azadiyê (OHD) a Amedê Bahar Akdemîr daxuyanî xwend. Bahar Akdemîr diyar kir ku wan di 14’ê Tîrmehê de bi girtiyan re hevdîtin kirine û anî ziman ku li girtîgehê binpêkirinên mafên mirovan ên cidî hene.
Bahar Akdemîr destnîşan kir ku gardiyanan di 7’ê Tîrmeha 2025’an de dema lêgerîna "rûtîn" dikirin û li ser girtiyan digeriyan heqaret li girtiyê bi navê Omer Cuma Salih kirine, gef lê xwarine û êrîşî wî kirine. Bahar Akdemîr anî ziman ku Salih di tiştên pê re rû bi rû maye di hevdîtina parêzerê xwe de wiha anî ziman: "Bi darekî li lingê min xistin û destê min xwar kirin. Min birin odeya yekkesî û bi saetan li wir hatim hiştim."
Bahar Akdemîr destnîşan kir ku êşkence ne tenê di dema lêgerînê de, piştî lêgerînê jî berdewam kiriye; Salih di hucreya yekkesî de rastî lêdanê hatiye û wî nebirine saziyeke tenduristiyê.
EV PÊKANÎN NE LI GORÎ RUHÊ CIVAKA DEMOKRATÎK E
Bahar Akdemîrê li ser şert û mercên giştî yên girtîgehan rawestiya û wiha pê de çû: "Daxwaza aştî û çareseriyeke demokratîk a hemû gel û civakên baweriyê yên li Tirkiyeyê dijîn îro ji her demê xurttir e. Polîtîkayên zext û tundûtûjiyê yên li girtîgehan bi awayekî zelal li dijî vê îradeya civakî ne.”
Bahar Akdemîrê anî ziman ku banga Rêberê Gelê Kurd Abdullah Ocalan ya ku di 27'ê Sibatê de kir, ji bo jinûve avakirina civakeke demokratîk û aştiyeke birûmet derfetek dîrokî pêşkêş kiriye û got ku lê pêkanînên li girtîgehan ne li gorî ruhê vê bangê ne.
DAXWAZ Û BANG
Di daxuyaniya hevpar a OHD, MED TUHAD-FED û Baroya Amedê de ev daxwaz hatin rêzkirin:
“Divê îşkence û pêkanînên xirab ên li Girtîgeha Xarpêtê tavilê bi dawî bibe. Divê der barê gardiyan û rêveberiya girtîgehê ya lêporsînek bi bandor, bêalî û serbixwe were vekirin. Divê tenduristî, ewlehî û mafên bingehîn ên hemû girtiyan werin misogerkirin."
'DIVÊ JI BO GIRTÎGEHAN GAV BÊN AVÊTIN'
Hevserokê MED TUHAD-FED’ê Kerem Canpolat ku di daxuyaniyê de axivî diyar kir ku divê li gorî ruhê pêvajoyê tevbigerin û xwest ku li dijî binpêkirinên mafên mirovan ên li girtîgehan tavilê tevdîr werin girtin.
Daxuyanî bi dirûşmea "Bijî berxwedana zindanan" bi dawî bû.