Şaxa Amedê ya ÎHD’ê û xizmên windayan, di 841’emîn hefteya çalakiya xwe ya "Bila winda werin dîtîn û kiryar werin darizandin" de li pêşiya Bîrdariya Mafê Jiyanê ya li Parka Koşûyolûyê li hev civiyan. Xizmên windayan di çalakiya vê hefteyê de wênenêyên kesên ku di bin çavan de hatine windakirin û qetilkirin, hilgirtin. Vê hefteyê çîroka Kemal Korkût ê ku di Newroza sala 2017’an de hatî qetilkirin, hate xwendin.

 

Hevserokê Giştî yê ÎHD’ê Huseyîn Kuçukbalaban bal kişand ser banga Rêber Apo û ev yek anîn ziman: ‘’Têkildarî birêvebirina pêvajoyê divê dewlet pêngavên hewce biavêje. Ji bo vê yekê pêngavên ku divê werin avêtin hene. Divê tavilê girtiyên nexweş werin berdan, girtiyên ku tehliyeya hatî taloqkirin, werin berdan û divê tavilê mijara ‘mafê hêviyê’ bikeve rojeva Meclîsê û têkildarî vê yekê guhertinên yasayî werin kirin.’’

 

Daxuyanî piştî çalakiya rûniştinê bi dawî bû.

 

ÊLIH 

 

Li Êlihê xizmên windayan û Şaxa ÎHD’ê ya Êlihê, di çalakiya xwe ya hefteya 667’emîn de li pêşiya Bîrdariya Mafên Mirovan a li ser Cadeya Gulîstan li hev kom bûn. Di çalakiyê de pankarta bi nivîsa "Bila winda werin dîtîn û kiryar werin darizandin" hate vekirin û wêneyên kesên winda hatin hilgirtin. Her wiha TJA, Meclîsa Dayikên Aşitiyê, Platforma Ked û Demokrasiyê, DEM Partî, DBP, OHD, rêveberên Baroya Êlihê û xizmên windayan beşdarî çalakiyê bûn.

 

Di çalakiya vê hefteyê de kujerên Abdûrahman Acar ê ku di 23’yê Adara 1993’yan de hatî qetilkirin, hate pirsîn.

 

Daxuyanî piştî çalakiya rûniştinê bi dawî bû.

 

COLEMÊRG 

 

Şaxa Colemêrgê ya ÎHD’ê û xizmên windayan di çalakiya xwe ya hefteya 167’emîn de li Kolana Hunerê ya li navçeya Geverê hatin li ba hev. Di çalakiyê de wêneyên windayan hatin hilgirtin û kujerên Ikbal Yaşar ê ku di Newroza 2008’an de hate qetilkirin, hatin pirsîn.

 

Daxuyanî piştî çalakiya rûniştinê bi dawî bû.