AMED – Malbatên leşker û polîsên di destê PKK’ê de diyar kirin ku operasyonek muhtemel a li dijî Qendîlê dê jiyana zarokê wan bikeve xetereyê û gotin: “Em naxwazin operasyon pêk were.”
Desthilatdariya AKP’ê beriya hilbijartina 24’ê Hezîranê dixwaze li dijî Qendîlê operasyonê li dar bixe. Muhtemela operasyonê bû sedema nerazîbûna malbatên leşker û polîsên di navbera 2015-2016’an de ji aliyê PKK’ê ve hatin desteserkirin. Malbatan diyar kir ku pêwîste pirsgirêk bi aştiyane bê çareserkirin û ew li dijî operasyona Qendîlê ne.
'JIYANA ZAROKÊN DIXIN XETEREYÊ’
Dayika leşker Muslum Altintaş xwest zarokên wan bigîjin malbatên xwe û got: “Em qet şer naxwazin. Li dijî Qendîlê operasyon pêk tê û kurê min li wir e, ez ji jiyana wî bi xetere me. Em naxwazin li tu deverê şer pêk bê. Bila li tu devera cîhanênê şer çênebe. Li cihê zarokên me lê ne jî em operasyon naxwazin. Divê dewlet viya baş dizanibe li cihê leşker û polîs lê desterkirîbin çawa şer pêk tê. Ma qey nizanin zarokên me li wir in. Ez wek dayikek ji dewletê rica dikim, bila vî şerî xelas bikin. Bila li hevhatinek çêbe û êdî bes e.”
‘EZ HEQÊ XWE LI DEWLETÊ HELAL NAKIM’
Bavê berbaz Semîh Ozbey, Gursel Ozbey jî destnîşan kir ku desthilatdariya heyî leşkerê desteserkirî ji nedîtî ve tê û wiha got: “Ji bo zarokên me bi saxî bigîhîjin me çi destê me tê em wê dikin. Dema hêj nû operasyona Qendîlê dest pê kir, min bang li serokomar kir. Teqez cihê zarokên me lê ne em bombebarandinê naxwazin. Ez ji roja ewil ve dibêjin tu tiştek bi şer û kuştinê çareser nabe. Ez wek bavê leşkerek desteserkirî naxwazin li herêmê operasyon pêk bê. Ez li dijî operasyonê me. Ez ji niha ve dibêjin, heke tiştek bi zarokên me were berpirsyar dewlet e. Ez ê tu demê heqê xwe li dewletê helal nekim.”
'XWEDÎ LI ZAROKÊN ME DERKEVIN’
Dayika leşker Suleyman Sungur jî ji bo ew bigîhîjin zarokên xwe bang li hemû partiyan kir û got: “Ev 3 cejn e ez kurê xwe nabînim. Min pir bêriya wî kiriye. Em her tim alîgirê aştîbûn û me zerar nedaye tu kesî. Ez ji rêxistinê bi hezar caran rica dikim, bila kurê min berdin. Ji dewletê jî rica min heye bila ji kerema xwe li zarokên me xwedî derkevin, aştiyê pêk bînin û da ku zarokên me rizgar bibin.”
‘EM Ê HETA DAWÎ BISEKININ?’
Bavê çawîşê pispor Umît Gicir, Musa Gicir jî diyar kir ku du sal e kurê wî di destê PKK’ê de ye û wiha got: “Me bi hemû siyasetmedar û nûnerên saziyên civakî re hevdîtin kir. Dewlet tenê ji me re dibêje sebir bikin. Ji bilî vê tu daxuyaniyê nade. Temam em bisekinin, lê em ê heta kengê bisekinin. Em ê heta dawî bisekinin? Dawiya vî karî çi ye. Bila vê êşê bi me nedin kişandin. Nêzî du salan e kurê min desteserkirîne. Êdî bila wî berdin. Bila zarokên me berdin em wê demê cejna rastî pîroz bikin.”