ÊLIH - Ji 267 cenazeyên ku leşkeran bi dizî ji Goristana Xerzanê derxistin hêj aqûbeta 265 cenazeyan ne diyar in. Malbata Muzeyyen Gordemîr a cenazeyê di nava 267 cenazeyan de ji gorê derxistin û birin Saziya Tipa Edlî, 3 mehin li ruxmê mînaka xwînê dan jî hêj aqûbeta keça xwe fêr nebûne. Malbatê got “Êdî bes e bila ev zilm bi dawî bibe."
Leşkeran di 19'ê Kanûna 2017'an de bi fermana dozgeriyê li Goristana Xerzan a Gûndê Oleka Jor 267 cenazeyên di demên cuda de di şer de jiyana xwe ji dest dabûn, derxistibûn û biribûn saziya tipa edlî. Ji cenazeyên 267 kesan aqûbeat cenazeyên 265 kesan ne diyar e. Ji 267 cenazeyên ku birin Saziya Tipa Edlî ya Stenbolê 267 aqûbeta cenazeyên Dilan Bingol û Celal Ovmen piştî 61 roj şûnde teslîmî malbata wan hat kirin. Aqûbeta 265 cenazeyan hêj ne diyar e. Malbata Muzeyyen Gordemir (Berivan) ku cenazeyê wê jî li Goristana Xerzan hatibû defin kirin û li di nava 267 cenazeyan de ji goristanê derxistin û birin Saziya Tipa Edlî ya Stenbolê, li ruxmê mînaka xwînê dabûn û serî li dozgeriyê dabûn jî hêj tu encam bi dest nexistine.
CEJN JÎ HAT Û ÇÛ
Xwişka Gordemir Şukran Sincar ku di heman demê de endama Meclîsa Dayikên Aştiyê ye, diyar kir ku li gorî tu pîvanên hiqûq, zagon û sincî tiştekî wisa tune ku cenazeyê hatiye defin kirin ji gorê derxin û bibin. Sincar, anî ziman ku ji bo ew berî cejna Remezanê cenazeyê xwişka xwe wergirin gelek dua kirin, lê cejnek din jî derbas bû hêj cenazeyê xwişka xwe negirtine. Xwişk Sîncar wiha got: "Cejnek din bê cenaze derbas bû. Her tişt wateya xwe winda dike. Min dixwest di Cejna Remezanê de li ser gora xwişka xwe dua bikim. Lê ev jî nebû. Em nizanin hestiyê xwişka min li ku ne. Xwişka min di sala 1993'an de jiyana xwe ji dest dabû. Dema xwişka min şehît ket, me bi salan nizanibû ku ka cenazeyê wê li ku ye. Piştî goristana Xerzan hat sazkirin em gihiştin cenazeyê xwişka xwe. Gorek ku em li ser dua bikin çê bû. Lê destûr nedan ku em li ser cenazeyan dua biken û hemû cenaze ji goristanê derxistin û birin. Ger cenaze hat defin kirin li ku be divê heta dawî li wir be. Di tu ol û pirtûkên pîroz de cenaze nayên vekirin ji cihê wan nayê derxistin. Berpirsê vê yekê kîye divê bê darizandin."
ÊDÎ BES E
Sîncar anî ziman ku wan piştî cenaze ji Goristana Xerzanê hatin derxistin mînaka xwînê dan û wiha got: "Êdî bes e. Me 3 meh berê xwîn da Saziya Tipa Edlî. Me mînaka DNA da. Em hestiyên xwe dixwazin. Hestî li ku bin divê bidin me. Divê dewlet hestiyên me bidin me. Em hestiyên xwe dixwazin. Em hestiyên hemû cenazeyan dixwazin. Her ku em dibêjin aştî, îktîdar ji bo îktîdara xwe di şer de israr dike. Em dibêjin ji vê zilmê re êdî bes e."