NAVENDA NÛÇEYAN - YRA, YRJ û Rêxistina Mafên Mirovan êrişên dewleta tirk ên li dijî rojnamegeran ên li Bakur û Rojhilatê Sûriyeyê şermezar kirin û ji Nûnertiya NY’ê re name şandin.
Bi pêşengtiya Yekitiya Ragihandina Azad (YRA), Yekitiya Ragihandina Jin (YRJ) û Komeleya Mafê Mirovan a Cizîrê têkildarî êrişên dewleta Tirk ên li ser herêmê û rojnamevanan, li pêşiya avahiya Netewên Yekbûyî (NY) çalakiyek xwepêşandanê hate lidarxistin.
Di çalakiya YRA, YRJ û Komeleya Mafê Mirovan a Cizîrê de bi dehan endamên YRA û YRJ û endamên Komeleya Mafê Mirovan beşdar bûn.
Daxuyanî bi deqeyek rêzgirtinê dest pê kir. Piştre Berdevka Yekitiya Ragihandina Jin (YRJ) Arîn Siwêd da zanîn ku di vê dema dawî de gelek rojnamevan jiyana xwe ji dest dan û raste rast ji aliyê dewleta Tirk ve hatin hedefgirtin. Arîn Swêd, got: “Herî dawî jî rê hevalê me yê rojnamevan Egîd Roj hat hedefgirtin û jiyana xwe ji dest da. Ev rojnamevan dema berê xwe didin van qadan, ne tenê ji bo xwe diçin. Ji bo ku rastiya dijmin û berxwedaniya gel ji raya giştî re nîşan bidin, berê xwe didin van qadan.”
Arîn Siwêd şehîdên Ragihandina Azad ên wek Cîhan Bîlgîn, Nazim Daştan û Egîd Roj û rojnamevanên ku li başûrê Kurdistanê hatine qetilkirin, bi bîr anî û got ku wê şehîd ji bo wan bibin hêza berxwedanî û heqîqetê. Arîn Siwêd, destnîşan kir ku dewleta Tirk nikare bi hedefgirtina rojnamevanan rastiya xwe veşêre û ragihand ku ew wek rojnemevan wê nameyekê radestî Netewên Yekbûyî bikin.
Her wiha Rêvebera Komeleya Mafê Mirovan Evîn Cûma jî diyar kir ku di aliyê mafê mirovan de ev êriş û hedefgirtina li ser sivîlan sûcek li dijî mirovahiyê ye û ev yek rê li ber azadiya rojnamevanan digire û wiha axivî: “Me ev yek bi taybet li Herêma Bakur û Rojhilatê Sûriyeyê dît ku çawa dewleta Tirk a dagirker rojnamevanan dike hedef û her roj wan qetil dike. Ev yek metirsiyekê li ser jiyana rojnamevanan çêdike, em dizanin ku di mafê mirovan de mafê rojnamevan di her aliyê de heye û nabe ku rojnamevan werin qetilkirin ji ber ku Rojnamevan çav û neynika civakê ne. Mafê dewleta Tirk nîne ku rojnamevanan bike hedef û wan qetil bike. Em niha tevî YRA û YRJ li vir kom bûne da ku dengê me bigihije giştî cîhanê û rastiya dewleta Tirk were nîşandan. Her wiha em ê li ser navê giştî rojnamevanan peyamekê radestî Netewên Yekbûyî bikin da ku êrişên li ser rojnamevanan bisekinin.”