RIHA – Nûnerê rojnameya Ozgur Gundemê yê Rihayê Kemal Kiliç di 32’emîn salvegera qetilkirinê de li ser gora xwe hat bibîranîn. Rojnameger Emrullah Acar got ku dê pênûsa wî li erdê nemîne.
Komeleya Rojnamegeran a Dîcle Firatê, li Rihayê nûnerê rojnameya Ozgur Gundemê yê Rihayê Kemal Kiliç ku hatibû qetilkirin, li ser gora wî bi bîr anî. Parlamenterê DEM Partiyê yê Rihayê Omer Ocalan, endamên Komeleya Çand, Piştevanî û Alîkariyê ya Malbatên ku Xizmên xwe li Axa Qedîm Winda kirine (KAT-DER), endamên partiyên siyasî, nûnerên saziyên civakî û rojnameger beşdarî merasîma bîranînê ya li Goristana Abdurrahman Dede a li navçeya Eyyûbiyê bûn.
Bîranîn bi rêzgirtinê destpê kir û endamê DFG’ê Emrullah Acar da zanîn ku bi hedefgirtina Kemal Kiliç ve çapemeniya azad hedef hatiye girtin. Acar bibîrxist ku beriya Kiliç bê qetilkirin, rojnameger Hafiz Akdenîz, Yahya Orhan, Apê Mûsa, Huseyîn Denîz hedef hatine girtin û wiha got: “Pênûnên wan li erdê neman. Heval û şopdoarên wan pênûsên wan hilgirtin. 32 sal ser qetilkirinê re derbas bû lê êrîşên li ser çapemeniya azad dewam dikin. Rojnameger Nazim Daştan Cîhan Bîlgîn, Egît Roj, Azîz Koyluoglu, Gulistan Tara û Hêro Behadîn ji aliyê heman hişmendiyê hatin qetilkirin.”
Hevserokê DEM Partiyê yê Rihayê Bekîr Karakeçîlî diyar kir ku divê dewlet bi qetlîaman re hevrû be û wiha got: “Rojnamegerên ku hatin qetilkirin ji aliyê serokwezîr û serokkomarê wê demê hedef hatin girtin. Em ê li cihê ku Kemal Kiliç hiştiye mezinkirina heqîqetê bidomînin. Xwestin pênûsekê bişkînin lê ew pênûs bû deh hezaran pênûs.”
Parlamenterê DEM Partiyê yê Rihayê Omer Ocalan balkişand ser êrîşên li ser çapemeniya azad û wiha got: “Kemal Kiliç ji aliyê hêzên tarî ve hat qetilkirin û îro jî êrîşên li ser çapemeniyê didomin. Her roj rojnameger tên qetilkirin.”
Bername piştî ku qurnefîl danîn ser gora Kiliç bi dawî bû.