ŞIRNEX- Serokê HADEP'ê Serdar Taniş û Ebûbekîr Denîz ên di dema binçavkirinê de hatibûn windakirin, di 24'emîn salvegera windakirina xwe de hatin bibîranîn. Di bîranînê de peyama têkoşînê hate dayin û hate daxwaz kirin ku kujer bên darizandin. 

 

Serokê HADEP'ê ya navçeya Silopiyayê Serdar Taniş û rêveberê partiyê Ebubekîr Denîz ku 24 sal berê hatibûn windakirin hatin bibîranîn. Di 24'emîn salvegera windakirina wan de, li ber avahiya Partiya Wekhevî û Demokrasiyê ya Gelan (DEM Partî) ya navçeya Silopiyayê daxuyanî hat dayin. Malbatên Serdar Taniş û Ebûbekîr Denîz, rêxistinên Partiya Herêmên Demokratik (DBP) û DEM Partî ên Şirnex û navçeyên wê, parlamenterê DEM Partî yê Şirnexê Mehmet Zekî Îrmez, endam û nûnerên saziyên sivîl û gelek kes tevlî daxuyaniyê bûn. Di daxuyaniyê de pankarta ku wêneyên Serdar Taniş û Ebubekîr Denîz li ser bû hat hilgirtin. Her wiha wêneyên Serdar Taniş û Ebûbekîr Denîz jî hatin hilgirtin.

 

Metna daxuyaniyê ji aliyê hevserokê DEM Partî yê Silopiyayê Îdban Kaplan ve hat xwendin. Îdban Kaplan bi bîrxist ku Serdar Taniş û Ebûbekîr Denîz piştî çûnê qeraqolê tu agahî ji wan nehatiyê standın û wiha got: "Ji roja ku hevalên me hatinê windakirin vir ve weke partî û malbatên wan têkoşîna xwe ya pêkhatina edaletê didomînin. Di şaxse wan de hata ku kujerên bi deh hezaran kesan ku hatinê windakirin hesap bidin em ê têkoşîna xwe bidomînin."

 

NAMEYA KU JI BAVÊ XWE RE NIVÎSAND XWEND

 

Piştî daxuyaniyê keça Ebûbekîr Denîz Ceylan Denîz nameya ku ji bavê xwe re nivîsandibû xwend. Ceylan Denîz, anî ziman ku 24 sal in aqubeta bavê wê nehatiyê ronî kirin û got:” Çavê me li he deriyê. Heta temenê min hinek mezin bû min nedizanî bavê min hatiyê windakirin piştrê hîn bûm. Ez hên biçûk bûn em çûn Kerboranê lê wê deme hestiyên me jî nedan. Her sal em hestiyên xwe dixwazin. Ew 24 sal in tu bersiv nedan me.” 

 

'KUJER LEVENT ERSOZ E’ 

 

Piştrê  bavê Serdar Taniş Şuayîp Taniş axivî û bi lêvkir ku tevî 24 sal derbasbûnê jî kujer nehatine cezakirin û got:” 24 salin me tu encam negirt. Em dixwazin faîlen hemû kesên hatinê windakirin bên cezakirin û cenazeyên wan radest bikin. Tu sucê Serdar û Ebûbekîr tune bû. Em dixwazin hemû kesen bi wicdan li ser vê dozê bisekinin. Faîlen me ne veşartine ne aşkera ne. Faîle me fermandarê cendirmeyan Levent Ersoz e. Çend caran gef li me xwaribû. Ji ber wê em dixwazin ben cezakirin. Heta bên cezakirin û cenazeyên me bidin em dev jî dozê bernadin."

 

'PÊYAMA MEZINKIRONA TÊKOŞÎNÊ’ 

 

Di dawiyê de parlamenterê DEM Partî yê Şirnexê Mehmet Zekî Îrmez axivî û diyar kir ku ji bo aştiyek bi rûmet pêk were divê faîlên hemû kesên hatinê windakirin bên cezakirin û ev tişt anîn ziman: "Her dû hevalên me ji ber fikir û rêmanên xwe hatin windakirin. Em dizanin ew pergala netew dewlet ji bilî tirkbûne tu netewan nasnake û tune dihesibîne. Bı hezaran Kurd hatin windakirin û komkujiyan re rû bi rû man. Ew pergal li ser qirkirine hatiyê rûnistandin. Em jî dibêjin faîlen wan diyar in. Rêyedarên dewletê yên Sirnexê faîl ew bi xwe bûn. Heta ku faîl hesap nedin em dev jî têkoşîna xwe bernadin. Niha qala aştiyê dikin. Ew hamle ji aliye Birêz Öcalan ve hat destpêkirin. Ji bo pirsgirêka Kurd bê çareser kirin û aştî pek were divê heqîqeta komisyonê bê avakirin û faîl bên cezakirin. Em tu car wan bir nakin û nadin ji bîrkirin."

 

Daxuyanî bi berzkirina dirûşmeyên "Şehîd namirin" bi dawî bû.