NAVENDA NÛÇEYAN - Rêveberiya Xweser a Şengalê bertek nîşanî Qanûna Efûya Giştî ku ji hêla Parlamentoya Iraqê ve hate qebûlkirin da. Rêveberiya Xweser diyar kir ku dê DAIŞ’î jî ji efûyê sûdê bigirin û xwest bê betalkirin.
Meclisa Rêveberiya Xweser a Şengalê (MXDŞ) têkildarî biryara Efûya Giştî ya Parlamentoya Iraqê daxuyaniyek da. Daxuyanî, li Şehîdgeha Şehîd Dilgeş û Şehîd Berxwedan ji aliyê Hevserokê MXDŞ’ê Nayif Şemo ve hat xwendin.
Di destpêka daxuyaniyê de îşaret bi kiryarên DAIŞ’ê yên li dijî civaka Êzidî hate kirin û wiha hate gotin: “Di havîna 2014’an de, em û civaka me rastî qirkirinek bi plan ya çeteyên DAIŞ’ê yên sûcdar hatin. Di encamê de, bi hezaran jin û mêr hatin qetilkirin û zêdetirî ji 6 hezar jin û keç hatin êsîr kirin, li bazaran hatin firotin. Kal, pîr û zarok jî bi armanca tunekirina pêkhateya Êzidî ji ser rûyê erdê hatin qetilkirin.
Parlamenta Iraqê heta îro ji bo naskirina jenosîda Êzidiyan bêdeng maye û neketiye nava hewldanê. Em wek Rêveberiya Xweser a Şengalê, biryara efûya giştî ya ku di 22’yê vê mehê de ji aliyê Parlamentoya Iraqê ve hate pejirandin, bi tundî şermezar dikin û red dikin.
KESÊN GELÊ ME QIR KIRIN DÊ BÊN BERDAN
Pêkanîna vê biryarê bûye sedema vekirina birîna civaka Êzidî, ku hîn jî pêwîstiya wê bi edaletê heye. Diviya Parlamentoya Iraqê ji bo lêgerîna jin û mêrên dîl hatine girtin, zelalkirina çarenûsa bi hezaran Êzidîya winda û vekirina bi dehan gorên komî ketiba nava tevgerê û biryar daba. Li şûna ku em bi lêgerîna windayan, azadkirina kesên revandî, qerebûkirina kesên ziyandar û jinûveavakirina herêmên me, Parlamentoya Iraqê ji bo kesên ku raste rast di êrişa qirkirinê ya li ser gelê me di cih girtine, biryara azadiyê dide.
Destûrdana bêcezakirina kesên sûcdar ku ev hovîtî kirine, xiyaneteke li xwîna qurbaniyan û binpêkirina prinsîbên edalet û mafên mirovan e. Ev biryar ne tenê binpêkirina mafên qurbaniyan e, bi awayekî eşkere piştgiriyeke nerasterast e ji bo baskên siyasî yên li Parlamenta Iraqê yên ku hewl didin wêneyê tawankaran paqij bikin û çanda bêcezakirinê bi pêş bixin. Ev yek hevahengiya di tawanên li dijî Êzidiyan de nîşan dide.
BANGA BETALKIRINÊ KIR
Em bang li Hikûmeta Iraqê dikin ku demildest vê biryarê betal bike, bi cîbicîkirina edaletê ji bo qurbaniyan pabend be û nehêle ku sûcdar azadiya xwe bi dest bixin. Em bang li civaka navdewletî jî dikin ku di vê doza dadperwer de li kêleka me raweste û fişarê li Hikûmeta Iraqê bike ku tawankar bên cezakirin. Em ê ji daxwaza xwe ya edalet û hesabpirsînê venegerin û rê nedin êşên gelê me ji bîra dîrokê bên paqijkirin.”