Ahmet Ozer ê ku di hilbijartinên herêmî yên 31'ê adarê de li navçeya Esenyûrtê ya Stenbolê bi "lihevkirina bajêr" wekî şaredar hat hilbijartin, di 30'yê cotmehê de hatibû binçavkirin. Li şûna Ozer, Cîgirê Waliyê Stenbolê Can Aksoy wekî qeyûm hat tayînkirin. Şaredariya Esenyûrtê navçeya herî mezin a Tirkiyeyê ye. Di heman demê de piştî Şaredariya Bajarê Mezin a Stenbolê, şaredariya budçeya wê herî zêde ya Stenbolê ye. Di heman demê de bi nifûsa xwe piranî jê kurd û koçber in, balê dikişîne. Şêniyên navçeyê bertek nîşanî girtina Ozer û tayînkirina qeyûm dan. 

 

‘EZ JI AMASYAYÊ ME LÊ LI PIŞT AHMET OZER IM'

 

Alî Emîrel diyar kir ku gelê Esenyûrtê bertekên xwe bi çûna mitînga li dijî qeyûm nîşan daye û got: “Dema ku welat di vê rewşê de be û zarok li nexweşxaneyan bên qetilkirin, ji bo guhertina rojevê çi ji destê wan tê dikin. Em heta dawiyê bi Ahmet Ozer re ne. Ez ji Amasyayê me. Ez muameleya ku ji aliyê polîsan ve li me tê kirin bi tundî şermezar dikim. Ez ji bo vîna xwe çûm mîtîngê, lê tu tişt nema ku polîsan ne anî serê me." 

 

CHP'Ê REXNE KIR: BILA LI DIJÎ QEYÛM LI BER XWE BIDIN

 

Yakûp Mandûz diyar kir ku desthilatê her tiştê ku xwest kiriye û bertek nîşanî vê bêdengiyê da û got: “Wekî gel me duh jî ew li Esenyurtê dîtin îro jî. Tê talankirin û wêrankirin. Yên li ser bêdeng dimînin. Ez li vir bi taybetî CHP’ê sûcdar dikim. Divê CHP di vê mijarê de tevbigere. Divê ew bêdeng nemîne. Divê li dijî qeyûman li ber xwe bide. Ji sedî 50'yê wê be, ji sedî 50'yê din jî yê CHP'ê ye. Çima CHP di vê mijarê de bêdeng dimîne? Li Meydana Esenyûrtê tu ji kê bipirsî heya ber dev tije bûye. Yên desthilatdar çi dixwazin digirin, kê dixwazin îşkence dikin, kê dixwazin dixin zindanan. Vê carê jî gel dibe sûcdar. Ger pêşengiya gel bê kirin, dikarin gelek tiştan bikin. Lê pêşeng tune. Wan mînak e. Li Wanê gelek hewl dan, lê nekarîn bi dest bixin. Ji ber ku gelê Wanê berxwedaneke mezin nîşan da. Ew berxwedêr bû û şaredariya xwe bi dest xist." 

 

Îbrahîm Ozgokçe anî ziman ku ew bi Ozer re ne û neheqiya li wî hatiye kirin li hemû gelê Esenyûrtê hatiye kirin. Ozgokçe diyar kir ku gelên bira wê her tim bi Ozer re bin û got: “Dê duayên me her tim pê re bin. Em hildibijêrin û ew di cî de êriş dikin."

 

Ekrem Ozer ê ku di hilbijartinan de dengê xwe daye Ahmet Ozer jî diyar kir ku qeyûm pêkanîneke li dijî demokrasiyê ye û polîtîkayeke ne exlaqî ye. Ozer diyar kir ku tayînkirina qeyûm û girtina Ozer bi operasyona ferasetê pêk hatiye û got: “Ev polîtîkaya tirsandinê ye. Tu kêmasî û pêkanînên şaş ên birêz şaredar nînin. Ji ber ku helwêsteke wî ya bi armanca eşkerekirina rûyê qirêj yê siyasetê hebû, tiştekî bi vî rengî anîn serê şaredar. Karên wî yên pir xweş hebûn. Bi pergaleke rêveberiyê ku li cîhanê bibe mînak, dest bi rêveberiya navçeya Esenyûrtê kir. Ez tayinkirina qeyûm şermezar dikim." 

 

‘EM QEBÛL NAKIN'

 

Akîf Yilmaz diyar kir ku qeyûm neheqî, bêhiqûqî û bêedaletî ye û got: “Em wek gelê Esenyûrtê vê bêhiqûqiya ku li Ozer tê kirin qebûl nakin. Ji ber ku kurd bû qeyûm tayîn kirin. Em wekî gel li dijî vê bêhiqûqiyê ne. Şaredarekî ku ji aliyê gel ve dihat hezkirin. Bi her kesî re, hem ciwan û hem jî mezin, hem dost û hem jî heval bû. Em bêsebr li benda wî ne."