AMED – Polîs Î.M., di 8'ê Cotmeha 2016'an de li navçeya Geverê ji maşîna zirxî li ser welatiyan gule reşandibû û 4 sivîl kuştibûn, 2 sivîl jî birîndar kiribûn. Derket holê ku Dadgeha Cezayên Giran a Geverê, beyî agahiyê bidin malbat û parêzerên malbatan li cihê bûyerê lekolîn û keşîf kirine.
5'emîn danişîna doza polîs Î.M., lê li Geverê ji maşîneya zirxî li ser welatiyan gule reşand û 4 welatî kuşt û 2 welatî birîndar kir û heta 15 salan cezayê girtîgehê jê tê xwestin li 3'emîn Dadgeha Cezayên Giran a Amedê hat dîtin. Di danişînê de polîsê bersûc Î.M. ku serbest tê darizandin amade nebû. Parêzerê kuştiyan tev li danişînê bûn. Dozger di danişinê de xwest belge û agahiyên kêm bên temamkirin. Parêzerê kuştiyan Serdar Işik, diyar kir ku keşif û lêkolîna cihê bûyerê bêyî agahiya wan hatiye kirin û wiha got: "Li gorî biryarê bersûc ji danişînê nehatiye muafkirin. Lê bersûc tev li danişînê nebûye. Ev nîşan dide ku bersûc ji dadgehê direve. Li gorî me bersûcê ku 4 kes kuştine û tev li danişînê nebe gumana wî a bireve pir zêde ye." Işik, xwest parêzerê alî û parezerê mexdûr tev li keşfê bibin.
Heyeta dadgehê daxwaza parezeran a bila polîsê bersûc Î.M. bê girtin red kir. Heyeta dadgehê dîsa daxwaza parêzeran a dîsa tev li keşfa cihê bûyerê bibin jî red kir. Heyeta dadgehê biryar da ku li benda bersîva nivîsa ji Dadgeha Ceza ya Gevere re şandine ku ferman daye heyeta 3 kesên pispor a li cihê bûyerê keşf kirine agahi bide, rawestin.
Heyeta dadgeh doz bi armanca kêmasî bên temamkirin taloqî meha Hezîranê kirin.
DER BARÊ BÛYERÊ DE
Polîsan di 8'ê Cotmeha 2016'an de li ser Kolana Cengîz Topel a naveçeya Geverê ya Colemêrgê, ji maşîneya zirxî ya kobra gule reşandin. Di bûyerê de Serhat Buldan, Rahmî Safahali, Necdet Îşozu û Aydin Tumen jiyana xwe ji dest dabûn, Şemsettîn Kaya û Mehmet Alî Kaya jî birîndar bûbûn. Doza der barê polîs Î. M. de hat vekirin, bi sûcdariya "Bi zanebûn kuştiye" heta 15 salan ceza jê re tê xwestin. Polîsan ji Maşina plakeya wê 30 A 0593 ya bi kodê Orman a aydi Midûriyeta Şaxa Tevgera Taybet a Colemergê gule li ser sivîlan reşandibû. Polîsan gule ji çeka li ser kuleyê ya maşîneyê reşandibûn. Salek û nêzî 7 meh di ser kuştinê re derbas bûn. 14 meh şûnde piştî lêpirsînê dîmenên nû derket holê. Polisê tevgera taybet Î.M., di 8'ê Cotmeha 2016’an de hat girtin. Di daxuyaniyên fermî de wekî “qaza” hat nîşandan. Serdozgeriya Komarê ya Geverê lêpirsîn temam kir û der barê polîs de bi sucdariya “Bi zanebûn bûye sedema kuştinê" ji 3 salan heta 15 salan ceza xwest û doz vekir. Piştî doz hat vekirin bi hinceta ewlehiyê doz li 3'emîn Dadgeha Cezayên Giran a Amedê berdewam dike.
Malbatên mexdûran bi riya parêzer pirsa "Der barê polîsê bersûc de lêpirsîna îdarî hatiye vekirin ya na?" ji heyeta dadgehê pirsîn. Heyeta dadgehê jî bersiv da û diyar kir ku lêpirsîn hatiye vekirin ya na nizanin. Lê Wezareta Karên Hundir, bi belgeyên serkeftin û takdîrê yên ku ji Midûriyeta Giştî ya Polîsan û Serfermandariya Artêşê dane Î.M. bersîv daye. Berê Medûrê Giştî yê Polîsan diyar kiribû ku der barê Î.M. de cezayê dîsîplînê daye.
Wezaretê bersiv da dadgehê ku der barê Î.M. de lêpirsîn nehatiye vekirin û di xezmeta operasyona li Şirnex û Silopiyê de belgeyên serkeftinê stendine. Wezaretê diyar kiribû ku Fermandariya Artêşa Giştî yû Midûryeta Polîsan a Stenbolê û Qeymeqamê Sîlopiyê belgeyên serkeftinê dane Î.M. û wêrekî û lenengî nişan daye.